ՔՊ-ական պաշտոնյաների բիզնեսները՝ մինչ հեղափոխությունը և այսօր. Վահագն Արսենյան

Այն բանից հետո, ինչ Ջերմուկի համայնքապետի ԺՊ նշանակվեց, ապա ընտրվեց Վահագն Արսենյանը, վերջինիս ընտանեկան բիզնեսի գործերը գնալով ծաղկում են: Բանն այն է, որ պետական կառույցների մեծ մասը նախընտրում է ջուր գնել հենց Արսենյանի ընտանիքին պատկանող «Ջերմուկ գրուպ»-ից։

Բերենք մի քանի օրինակ: ՀՀ էկոնոմիկայի նախարարությունը նախորդ տարի «Ջերմուկ գրուպ»-ից 43,200 դրամի գնում է կատարել, ՀՀ դատախազությունը՝ 36,000 դրամի, Հակակոռուպցիոն կոմիտեն՝ 21,000 և 36,600, 41,100, 38,700, 38,700 և 239 հազար դրամի, ՀՀ արտաքին գործերի նախարարությունը՝ 46,000 , 15,100 ,38,500 , 43,500 դրամի, առողջապահության նախարարությունը՝ 51,840 դրամի։

Նախորդ տարի ընկերության հետ ծառայությունների գնման պայմանագիր է կնքել տարածքային կառավարման նախարարությունը։

Ինչպես նաև էկոնոմիկայի նախարարությունը։

Գնորդների թվում էր նաև շրջակա միջավայրի նախարարությունը։

Բացի այս գնումներից, որոնք նախորդ տարի մեկ անձից կատարած գնումների ընդամենը մեկ տոկոսն են, կառավարությունը 3.8 միլիարդ դրամի ներդրման դիմաց 250 միլիոն դրամի մաքսային արտոնություն է տվել «Ջերմուկ գրուպ» ընկերությանը։

Բացի այդ Ջերմուկում շինարարական աշխատանքները իրականացնում է հենց Արսենյանի ընտանիքին պատկանող «Ջերմուկ Գրուպ»-ը` իր ֆինանսական միջոցներով։ Դիցուք` Ջերմուկում կկառուցվի նոր բնակելի թաղամաս՝ բաղկացած մոտ 300 բնակարանից։ Ծրագրի նախագիծը արդեն կա, իսկ կառուցապատման աշխատանքների մեկնարկը կտրվի 2022 թվականի մայիս ամսից։ Ծրագիրը իրականացվում է «Ջերմուկ Գրուպ» ընկերության կողմից։