Սի Ցզինպինը երրորդ անգամ Չինաստանի նախագահ է ընտրվել

Ազգային Ժողովրդական Կոնգրեսի պատգամավորները միաձայն վերընտրել են Սի Ցզինպինին Չինաստանի նախագահի պաշտոնում երրորդ հնգամյա ժամկետով։
Պետության ղեկավարի ընտրությունը տեղի է ունեցել այսօր առավոտյան` լիագումար նիստում։ Փակ գաղտնի քվեարկությանը մասնակցել է 2952 պատգամավոր, գրում են միջազգային ԶԼՄ-ները։

Սի Ցզինպինը դարձավ Չինաստանի առաջին նախագահը, ով ընտրվեց երրորդ ժամկետով։
Բացի այդ, քաղաքական գործիչը վերընտրվել է Չինաստանի Կենտրոնական ռազմական խորհրդի ղեկավարի պաշտոնում։

Սի Ցզինպինը Չինաստանի նախագահ է դարձել 2013 թվականի մարտին, իսկ երկրորդ հնգամյա ժամկետով վերընտրվել էր 2018 թվականի մարտին։

Սի Ցզինպինը այս տարի կդառնա 70 տարեկան, և չկա հստակ կանխատեսում, թե որքան ժամանակ է նա նախատեսում մնալ իշխանության ղեկին: Որոշ վերլուծաբաններ հակված են կարծելու, որ ներկայիս առաջնորդը ձգտում է պահպանել իր պաշտոնը առնվազն մինչև 2035 թվականը։ Այս ընթացքում նախատեսվում է «սոցիալիստական ​​արդիականացման և չինական ազգի վերածննդի» առաջին փուլը։ Նա մտադիր է ստեղծել միջին եկամուտ ունեցող հասարակություն, արդիականացնել բանակը, իրականացնել սոցիալական, տնտեսական և քաղաքական բարեփոխումներ։