Կիևում հայտնել են, որ Ուկրաինան երկու ամսից հակահակահարձակում կգործի

Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը պնդում է, որ Ուկրաինայի Զինված ուժերի հակահարձակումը հնարավոր է երկու ամսից։
Նրա խոսքով՝ Կիևի ուժերը «կենտրոնացած են հակահարձակման վրա, որը տեղի կունենա մոտ երկու ամսից»։ «Մենք պետք է մեծացնենք ծանր 155 մմ հրետանային արկերի մատակարարումը։ Մենք չենք շտապում, մենք վերակազմավորվում ենք առաջիկա երկու ամիսների ընթացքում»,- ասել է նա ուրբաթ օրը La Stampa թերթին տված հարցազրույցում։

Հինգշաբթի օրը Financial Times-ը, վկայակոչելով արևմտյան պաշտոնյաներին և վերլուծաբաններին, հայտնել է, որ Ուկրաինայի զգալի կորուստները Արտեմովսկի (ուկրաինական անվանումը՝ Բախմուտ) համար մղվող մարտերում կարող են նվազեցնել Ուկրաինայի Զինված ուժերի ներուժը գարնանային հակահարձակում իրականացնելու համար։ Արտեմովսկի համար մարտերին մասնակցող ուկրաինացի զինվորներից մեկը Financial Times-ին ասել է, որ Ուկրաինայի զինված ուժերի համար օրեցօր ավելի ու ավելի դժվար է դառնում քաղաքը պահելը։

Ավելի վաղ Bild թերթը, հղում անելով աղբյուրներին, հայտնել էր, որ Արտեմովսկի շուրջ ստեղծված իրավիճակը վեճերի պատճառ է դարձել Ուկրաինայի նախագահ Վոլոդիմիր Զելենսկու և Ուկրաինայի զինված ուժերի գլխավոր հրամանատար Վալերի Զալուժնիի միջև։ Նրանց խոսքով՝ Զալուժնին մի քանի շաբաթ առաջ Զելենսկիին ասել է Արտեմովսկից ուկրաինական զորքերի նահանջի անհրաժեշտության մասին։ Սակայն Ուկրաինայի նախագահը սկզբունքորեն այլ դիրքորոշում ունի այս հարցում։ Երկուշաբթի օրը Զելենսկու մամուլի ծառայությունը հայտնել է, որ Զալուժնին և Ուկրաինայի Զինված ուժերի ցամաքային զորքերի հրամանատար Ալեքսանդր Սիրսկին հանդես են եկել Արտեմովսկում մարտերը շարունակելու և քաղաքում ուկրաինական դիրքերի ամրապնդման օգտին։