Առավոտ. «Բրդերը զատելու ժամանակը»

Բրիտանիայի պաշտպանության նախարար Լիամ Ֆոքսը կամավոր հրաժարական է տվել, որովհետև «խառնել է սեփական բուրդը» պետականի հետ, կամ, ինչպես ինքն է արտահայտվել՝ օգտագործելով շատ ավելի նրբանկատ ձևակերպում՝ «ինձ թույլ եմ տվել լղոզել իմ սեփական շահերի և կառավարությունում գործունեության միջև եղած սահմանը»...

Հայաստանում նման բան հնարավոր չէ մի քանի պատճառով։ Նախ, կառավարության անդամների և ընդհանրապես իշխանության գործունեությունը դուրս է հասարակության վերահսկողությունից. մենք ստույգ չգիտենք, թե ում հետ են նախարարները մեկնում պաշտոնական արտասահմանյան ուղևորությունների։ Եվ եթե նույնիսկ նման տեղեկատվություն հայտվում է մամուլում, ապա այն շատ նման է բամբասանքի, քանի որ լրատվամիջոցը կարողացել է տեղեկություն հայթայթել տվյալ պաշտոնյայի գործունեության մասին միայն այն պատճառով, որ «չուզողություն» դրսևորող մեկ այլ պաշտոնյա այս մեկի վրա «գործ է տվել»»,– կարդում ենք «Առավոտ» թերթում։

Շարունակելով միտքը՝ գրված է. «Բայց կա մեկ հիմնական պատճառ, որի հետ համեմատած, բոլոր մնացած պատճառներն անկարևոր են դառնում. հասարակությունը թեև արտաքուստ և մի քիչ երեսպաշտորեն դատապարտում է մեր պաշտոնյաների պահվածքն ու օրինակ բերում եվրոպացիների վերը շարադրված վեհանձն կեցվածքը, բայց հոգու խորքում գտնում է, որ պաշտոն ունենալով՝ քավորին կարելի է և պետք է լավություն անել՝ բա ու՞ր մնացին մարդկությունը, թասիբը և ջիգյարը»։