Կահույք, տեխնիկա և հուշանվերներ. ինչի վրա է ծախսում բյուջեի գումարները Տավրոս Սափեյանը

Վերլուծական 13 Մարտ, 2023 20:40

2021-ի դեկտեմբերին ծայր առած նախընտրական կրքերը ժամանակի ընթացքում մարեցին, և թվում էր, որ զոռով-շառով ընտրված քաղաքապետ Տավրոս Սափեյանին ոչինչ չի խանգարելու բաղձալի պաշտոնը ստանալուց հետո անցնել բուռն աշխատանքային գործունեության։

Դեկտեմբերին կայացած ՏԻՄ ընտրություններից հետո Սափեյանը մի քանի անգամ հանդիպել է համայնքի բնակիչների հետ, ինչպես իրական ջենթլմեն` շնորհավորել կանանց միամսյակի առթիվ, չի մոռացել, անշուշտ, նաև Ամանորը և Բանակի օրը։ Մնացած հարցերում քար լռություն է, իսկ համայնքի ՖԲ էջը ավելի շատ հիշեցնում է հայտարարությունների տախտակ։ Մինչդեռ բոլորս էլ քաջ հիշում ենք, թե ինչպիսի պաթոսախառն նախընտրական հոլովակ էր պատրաստել Սափեյանը, որը շատերին հիշեցրեց առաջին դասարանցու հանդեսի ելույթ: Այդ ելույթը և, ընդհանրապես, Սափեյանի նախընտրական խոստումները լի էին պաթոսով, չնայած որ չէին տարբերվում իր մյուս թիմակիցների տված խոստումներից՝ ախատատեղեր, ներդրումներ, ենթակառուցվածքներ: Անցել է բավականին երկար ժամանակ, սակայն նշված երեք բաղձալի երևույթներից և ոչ մեկը Թալին չի հասել, այդ մասին չկա ոչ մի պաշտոնական հիշատակում: Փոխարենը` Սափեյանների մոտ է ամեն ինչ կարգավորվել, հիշեցնենք` նրանք, ըստ էության, գրավել են Թալինը. համայնքի ՋԸՕ-ի պետն էլ Անդրանիկ Սափեյանն է` համայնքապետի եղբայրը:

Դեկտեմբերյան խժդժություններից հետո Թալինում կրկին ընտրություններ անցկացվեցին՝ այս տարվա սեպտեմբերին և կրկին ականատես չենք լինում տված խոստումների իրականացմանը:

Համայնքապետարանի պաշտոնական կայքէջն էլ որևէ կերպ չի վկայում տրված խոստումների կատարման մասին: Սափեյանը աշխատանքային այցեր է կատարել տարբեր բնակավայրեր, հանրային քննարկումներ է անցկացրել, ասֆալտապատվել է մեկ փողոց, մեկ ավտոբուս է համայնքը նվեր ստացել, մի շարք շենքերի բակերում ապամոնտաժման աշխատանքներ են տարվել, մանկապարտեզին խաղալիքներ են նվիրվել համայնքապետի անունից: Իհարկե, ինչպես ասում էին՝ կարող էին նաև այս ամենը չանել, սակայն, համաձայնեք, որ բազմապիսի խոստումներ շռայլելուց հետո ավտոբուս նվեր ստանալը և մանկապարտեզին խաղալիք նվիրելն այն տիտանական աշխատանքը չէ, որի համար թալինցին իր քվեն տվել էր ՔՊ-ն ներկայացնող Սափեյանին...

Ուշագրավ են նաև Թալինի համայնքապետարանի գնումները: Դիցուք՝ դիզվառելիքի գնման մրցույթին մասնակցել է նաև «Սափեյան եղբայրներ» ՍՊԸ-ն: Որքան էլ զարմանալի է, սակայն, մրցույթում արդյունքում հաղթող է ճանաչվել «Մաքս Օիլ»-ը։

Իսկ ըստ 2023 թվականի գնումների պլանի՝ համայքնապետարանը նախատեսում է 600 հազար դրամի գրադարակներ ձեռք բերել, 300 հազար դրամի հուշանվերներ, 1800000 դրամի բազկաթոռ, 900 հազար դրամի գրապահարան, 900 հազար դրամի նոութբուք և այլն։

2017-ին այն ժամանակվա ընդդիմադիրները քննադատում էին Թալինի ՀՀԿ-ական համայնքապետին , որ վերջինս գնել էր 200 հատ վարդ, որի համար ծախսվել է 100 հազար դրամ, 500 հատ մեխակ` 50 հազար դրամ, 50 հատ ծաղկեպսակ` 600 հազար դրամ: Ինչպես տեսնում ենք՝ հեղափոխությունից հետո հեղափոխական թիմի անդամների ախորժակը նախկին պաշտոնյաների ախորժակին ոչնչով չի զիջում...