Ուկրաինան զենքի ներմուծման ծավալով աշխարհում երրորդ տեղում է

2022 թվականին Ուկրաինան սպառազինությունների ներկրման թվով աշխարհում երրորդն է Քաթարից և Հնդկաստանից հետո, ասվում է Ստոկհոլմի Խաղաղության միջազգային հետազոտությունների ինստիտուտի զեկույցում, գրում են միջազգային ԶԼՄ-ները։

2018 թվականից Ուկրաինան այս ցուցանիշով զբաղեցրել է 14-րդ տեղը՝ համաշխարհային ներմուծման 2 տոկոս մասնաբաժնով։ Կիևի խոշորագույն մատակարարներն են եղել ԱՄՆ-ն (34%), Լեհաստանը (17%) և Գերմանիան (11%)։

Միևնույն ժամանակ, ամերիկյան արտահանումն Ուկրաինա, որը կտրուկ աճել է ռուսական ռազմական ներխուժումից հետո, իր ծավալով դեռևս զիջում է ԱՄՆ-ից Քուվեյթ, Սաուդյան Արաբիա, Քաթար և Ճապոնիա մատակարարումներին։

Ըստ զեկույցի՝ հիմնական պատճառն այն է, որ ԱՄՆ-ն այդ երկրներ է փոխանցում ավելի առաջադեմ և թանկարժեք զինատեսակներ, այդ թվում՝ մարտական ​​ինքնաթիռներ և հակաօդային պաշտպանության համակարգեր։ Ուկրաինան հիմնականում ավելի հին զինատեսակներ է ստանում Պենտագոնի պահեստներից։