Նախկին պաշտոնյա օլիգարխների բիզնեսները մինչ հեղափոխությունը և այսօր

Թեև ՀՀ իշխանությունները պարբերաբար մեղադրում են իրենց նախորդներին կոռուպցիայի, թալանի և մնացյալ՝ հնարավոր և անհնարին մեղքերի մեջ, դա, այնուամենայնիվ, չի խանգարում կառավարությանը միլիոնների հասնող հարկային արտոնություններ տրամադրել նախկին պաշտոնյաների հետ փոխկապակցված ընկերություններին։ Հեղափոխությունից ուղիղ չորս տարի անց հետ հայացք գցելով այն արտոնություններին, որոնք այս տարիների ընթացքում բաժանել է Փաշինյանի կառավարությունը` պարզ է դառնում մի օրինաչափություն` դրանցից ամենախոշորները բաժին են հասել հենց նախկին պաշտոնյաների հետ փոխկապակցված ընկերություններին։

Դիցուք՝ նոր իշխանության օրոք էլ գործարար, ՀՀԿ-ական պատգամավոր Սամվել Ալեքսանյանին ոչինչ չի խանգարում ընդլայնել բիզնեսները։ 

Կառավարությունը 55 տարվա ընթացքում 6 արտոնություն է տրամադրել ԱԺ նախկին պատգամավոր, գործարար Սամվել Ալեքսանյանի դստերը՝ Աստղիկ Ալեքսանյանին պատկանող «Տեքսաս փրոդաքշըն» ընկերությանը։ Աստղիկ Ալեքսանյանը փակ բաժնետիրական ընկերության հիմնադիրներից մեկն է, սակայն որքան բաժնեմասն է նրան պատկանում` հայտնի չէ։ Սա միակ արտոնությունը չէ, որ ստանում է գործարարի դստեր ընկերությունը։ Հուլիսի 1-ին կառավարության մեկ այլ որոշմամբ՝ մաքսատուրքից ազատվել է Աստղիկ Ալեքսանյանին պատկանող մեկ այլ ընկերություն ևս՝ «Ալեքս տեքստիլ»-ը։ Այս ընկերությունը նույնպես իր 3-րդ արտոնությունն էր ստանում։ Տրված արտոնությունների ընդհանուր ծավալը կազմել է 1,5 միլիարդ դրամ։ Կառավարության մարտի 9-ի նիստում Սամվել Ալեքսանյանին պատկանող «Ալեքս Տեքստիլ» ընկերությանը հարկային նոր արտոնություն տրվեց։ Ընկերությանը պատրաստվում են ազատել ներկրման մաքսատուրքից։ Ըստ նախագծի՝ Սամվել Ալեքսանյանի ընկերությունը պատրաստվում է 3.3 միլիարդ դրամի հումք ներկրել Հայաստան, եւ մաքսատուրքից ազատման արտոնությունը գնահատվում է 173 մլն դրամ, այսինքն՝ Ալեքսանյանը 173 մլն դրամ չի վճարի ՀՀ պետական բյուջե։

Պետական գնումներում այլընտրանքի առկայության պարագայում ոչ մրցակցային հիմքով ծախսային ենթաուղղություններից է անշարժ գույքի եւ սարքավորումների ձեռքբերումը։ Այս գնումներին մասնակցել է գործարար Սամվել Ալեքսանյանի կինը՝ Շողերինա Մկրտչյանը։ ՀԿ-ի՝ մեզ տրամադրած որոշ տվյալներից պարզ է դառնում, որ ՊԵԿ-ը տիկին Մկրտչյանից տարածք է վարձակալում դեռեւս 2012 թվականից, համագործակցությունը շարունակվել է մինչեւ 2020 թվականը։

Բացի այդ, ԲԴԽ ղեկավարությունը 22 եւ 29 հատ օդորակիչ է գնել  Սամվել Ալեքսանյանին պատկանող «Վեգա» խանութների ցանցից։  29 հատ «12000 BTU» օդորակիչների ձեռքբերման համար վճարվել է 5 միլիոն 365 հազար դրամ,  իսկ թվով 22 հատ  «24000 BTU» օդորակիչների ձեռքբերման համար՝ 7 միլիոն 700 հազար դրամ։

Սամվել Ալեքսանյանի հետ կապվող «Վեգա Ուորլդ»-ից Ռոմանոս Պետրոսյանի ՊՎԾ-ն 117,000 դրամի կտորից պայուսակ է գնել:

Ուշագրավն այն է, որ չնայած Ալեքսանյանը հանդիսանում էր նախկին իշխանության կարկառուն ներկայացուցիչը՝ ՀՀԿ իշխանության ղեկին գտնվելու ողջ ընթացքում նա ստացել է ընդամենը  2 արտոնություն: Իհարկե, վերջինս ուներ մենաշնորհ ապրանքային մի շարք շուկաներում և ակնհայտ է, որ այդ հանգամանքի վրա իշխանությունները աչք էին փակում, սակայն, իշխանությունները՝ արդեն նոր իշխանությունները այդ հանգամանքի վրա աչք են փակում նաև այսօր: Մինչդեռ նախկին պատգամավոր օլիգարխի բիզնեսը հեղափոխությունից հետո ակնհայտորեն շատ ավելի ծաղկուն վիճակում է գտնվում, քան իր հարազատ քաղաքական ուժի ղեկավարման տարիներին: