Թուրքմենստանում առաջարկել են Էրդողանին Խաղաղության Նոբելյան մրցանակի առաջադրել

Թուրքմենստանի նախկին նախագահ Գուրբանգուլի Բերդիմուհամեդովը պաշտպանել է Թուրքիայի նախագահ Ռեջեփ Թայիփ Էրդողանին Խաղաղության Նոբելյան մրցանակի թեկնածու առաջադրելու գաղափարը, հաղորդում է Golden Age-ը։

Անկարայում Թուրքական պետությունների կազմակերպության արտահերթ գագաթնաժողովում Բերդիմուհամեդովը նշել է, որ Էրդողանին ճանաչում է 22 տարի։ Նախկին նախագահը Թուրքիայի ղեկավարին անվանել է ականավոր անձնավորություն և համաշխարհային մակարդակի քաղաքական գործիչ, ով «մեծ աշխատանք է կատարում խաղաղ կյանք ապահովելու համար ոչ միայն իր ժողովրդի, այլև բոլոր մահմեդական ժողովուրդների համար»:
«Ելնելով դրանից՝ առաջարկվում է խաղաղության Նոբելյան մրցանակի համար առաջադրել Թուրքիայի Հանրապետության նախագահին, և մենք լիովին աջակցում ենք բոլոր համապատասխան առաջարկներին», - ասել է Բերդիմուհամեդովը։

Անցյալ տարվա դեկտեմբերի վերջին Թուրքիայի խորհրդարանի նախագահ Մուստաֆա Սենթոփը հայտարարեց, որ նախաձեռնել է Էրդողանի առաջադրումը Խաղաղության Նոբելյան մրցանակի համար՝ «Ռուսաստանի և Ուկրաինայի միջև խաղաղությանը նպաստելու համար»։ Նրա խոսքով՝ ճգնաժամային հարցերում Թուրքիայի ջանքերը ողջունվում են ամբողջ աշխարհում։ Ուկրաինայում ռուսական ռազմական գործողության սկզբից ի վեր Անկարան բազմիցս առաջարկել է իր միջնորդությունը։ Թուրքիայի օգնությամբ կնքվել է հացահատիկի գործարք, անցյալ տարվա գարնանը բանակցություններ են տեղի ունեցել ռուսական և ուկրաինական պատվիրակությունների միջև։

Թուրքիայի ղեկավարի թեկնածությունն առաջարկել է նաև Հունգարիայի արտաքին գործերի նախարար Պետեր Սիյարտոն։ Նա նշել է, որ ռազմական հակամարտության ընթացքում Ռուսաստանի և Ուկրաինայի միջև «միջնորդության միակ հաջող փորձը» պատկանում է Թուրքիայի նախագահին։ Հունվարին Պակիստանի Սենատի նախագահ Մուհամմադ Սադիկ Սանջրանին պաշտոնապես գրանցեց Էրդողանի թեկնածությունը Նոբելյան մրցանակի համար «ուկրաինական ճգնաժամի կարգավորմանն ուղղված ջանքերի համար»։

Խաղաղության Նոբելյան մրցանակի վերջին արարողությունը տեղի է ունեցել անցյալ տարվա դեկտեմբերին` Օսլոյում։ Մրցանակը կազմել է 10 միլիոն շվեդական կրոն (մոտ 970 հազար դոլար):