Մութ ամպեր՝ Մուշեղ Մուրադյանի գլխավերևում. Փաշինյանը «կզոհաբերի՞» հերթական թիմակցին

Այսօր տարածված տեղեկության համաձայն ՝ Նիկոլ Փաշինյանի որոշմամբ Շիրակի մարզպետ Մուշեղ Մուրադյանը 8-օրյա արձակուրդի է մեկնել, այն էլ՝ չվճարվող: Այս տեղեկությանը նախորդել էր մեկ այլ տեղեկություն: Մասնավորապես՝ shamshyan.com կայքը գրել էր, որ մարտի 7-ին արտառոց գողության դեպք է տեղի ունեցել Շիրակի մարզում։ Այդ օրը ժամը 22։50-ի սահմաններում ՀՀ ներքին գործերի նախարարության Ոստիկանության օպերատիվ կառավարման կենտրոն է ահազանգել Երևանի բնակիչ 56-ամյա Աշոտ Ռ․-ն և հայտնել, որ Սառնաղբյուր գյուղի խաչմերուկում տրակտորով կարմրահող են գողանում։ Վերջիններս հայտնել են, որ առանց որևէ մեկին տեղյակ պահելու, նշված տեղանքից բարձել են «Սինո Հիդրո Քորպորեյշն» ՍՊԸ-ին պատկանող մոտ 5 խ/մ խճաքար Սառնաղբյուր գյուղի գերեզմանոցի ճանապարհին լցնելու և հարթեցնելու նպատակով։Գ․ Շամշյանի տեղեկություններով՝ ոստիկանությունում և քննչական բաժնում ունեն օպերատիվ տեղեկություններ, որ խճաքարի գողությունը կատարվել է Շիրակի մարզպետ Մուշեղ Մուրադյանի և Անիի խոշորացված համայնքի ղեկավար Արման Սարիբեկյանի ցուցումով։ 

Եվ ուշագրավ է, որ անմիջապես այս նորությունից հետո Փաշինյանը մարզպետին արձակուրդ է ուղարկում, չնայած վերջինս ընդամենը մեկ ու կես ամիս առաջ էր ստանձնել պաշտոնը և ակնհայտ է, որ աշխատանքից տանջահար չէր եղել, որպեսզի հապճեպ արձակուրդի կարիք ի հայտ գար: Հաշվի առնելով, որ վերջին շրջանում բավական աղմոտ ձերբակալություններ և հրաժարականներ եղան, այս ամենը մտածելու տեղիք է տալիս, որ հաջորդ թիրախը կարող է լինել հենց մարզպետը:

Ի դեպ, նման սցենարը Շիրակի մարզի ՔՊ-ականներից շատերի սրտով կարող է լինել, քանի որ այստեղ մարզպետի պաշտոնի համար մշտապես շահերի բախում է առկա եղել, որն ակնհայտորեն ոչ մի տեղ չի վերացել Մուրադյանի՝ այդ պաշտոնը զբաղեցնելուց հետո: Մուշեղ Մուրադյանը մինչ այս բարձր պաշտոնին անցնելը զբաղեցրել է Արփի լիճ ազգային պարկի տնօրենի պաշտոնը: Ի դեպ, վերջինիս կողմից այս պաշտոնը ստանձնելու պատմությունը բավական ուշագրավ է: Շրջանառվող լուրերի համաձայն՝ «Արփի լիճ» ազգային պարկի տնօրենի իրական թեկնածուն հենց նա էր, չնայած այն հանգամանքին, որ մրցույթ էր հայտարարվել: Մուրադյանը վայելում էր Շիրակի նախկին մարզպետ Կարեն Սարուխանյանի հովանավորությունը: 

Մուրադյանի՝ արձակուրդում գտնվելու ընթացքում նրան փոխարինելու է փոխմարզպետ Ալբերտ Այվազյանը, ով Նազելի Բաղդասարյանի հրաժարականից հետո համարվում էր մարզպետի հիմնական թեկնածուն, ըստ որոշ տեղեկությունների՝ նրա համար լոբբինգ էր անում անձամբ Բաղդասարյանը, սակայն Փաշինյանը նախապատվությունը տվեց Մուրադյանին: Եվ եթե ինչ-ինչ պատճառներով Մուրադյանը հեռանա զբաղեցրած պաշտոնից, ապա սա լավ շանս է Այվազյանի և Բաղդասարյանի համար՝ ամրապնդել իրենց ազդեցության լծակները մարզում:

Ակնհայտ է, որ Շիրակում ՔՊ-ականների համար արշալույսները բնավ էլ խաղաղ չեն, իսկ թե ինչով կավարտվի այս պատմությունը՝ կիմանանք մոտ ժամանակներում...