Ճապոնիան Ուկրաինային 470 մլն դոլար անհատույց օգնություն կտրամադրի

Ճապոնիայի իշխանությունները որոշել են 470 միլիոն դոլար անհատույց օգնություն հատկացնել Ուկրաինային էներգետիկ և այլ կարիքների համար, ևս 30 միլիոն դոլար՝ ոչ մահաբեր սարքավորումների համար։ Այս մասին Կիև կատարած այցից հետո հայտարարել է Ճապոնիայի վարչապետ Ֆումիո Կիսիդան, նրա խոսքերը մեջբերում է ճապոնական Kyodo գործակալությունը։

«Մենք շարունակելու ենք անխոչընդոտ աջակցել Ուկրաինային այնպես, որ կարող է անել միայն Ճապոնիան։ Ճապոնիան կլինի Ուկրաինայի հետ այնքան ժամանակ, մինչև խաղաղությունը չվերադառնա ուկրաինական գեղեցիկ հողում»,- ասել է Ֆումիո Կիսիդան բանակցություններից հետո Վոլոդիմիր Զելենսկու հետ համատեղ մամուլի ասուլիսում։

Բացի այդ, Ֆումիո Կիսիդան Ուկրաինայի նախագահին հրավիրել է առցանց մասնակցելու G7-ի գագաթնաժողովին։ Ըստ Kyodo-ի՝ այս հրավերն ընդունվել է։