Ինչ ունեցվածք են հայտարարագրել և ինչով են հայտնի Արմավիր համայնքի ավագանու ՔՊ-ական անդամները

Շարունակելով ընթերցողների ուշադրությանը ներկայացնել ՀՀ խոշոր համայնքների և քաղաքների ավագանու անդամների կողմից ներկայացված եկամտի և ունեցվածքի հայտարարագրերը՝ այսօր կանդրադառնանք Արմավիր քաղաքի ՔՊ-ական ավագանու անդամներից մի քանիսին:

Դիցուք՝ Արմավիրի համայնքապետ Դավիթ Խուդաթյանը հայտարարագրել է 1 անշարժ գույք, 4 միլիոն դրամ կանխիկ գումար, բանկային հաշվի մնացորդը կազմել է 337 հազար 972 դրամ, եկամտի աղբյուրը՝ 7 մլն 76 հազար 648 դրամ։

Համայնքի ղեկավարի տեղակալ Վարշամ Սարգսյանի անունը առաջին անգամ մամուլում հայտնվեց այն բանից հետո, երբ քաղաքապետ Խուդաթյանը Արմավիր համայնքի դպրոցներից մեկի տնօրենին աշխատանքից ազատել էր՝ փոխքաղաքապետին խոզապահ անվանելու համար:

Ավագանու անդամ Սուսաննա Մատինյանը  հայտնի ակտիվիստ է,  «Երիտասարդական  ավանգարդ» ՀԿ-ի ղեկավարը: Ուշագրավ է, որ վերջինիս ՀԿ-ն սոցապ.նախարարության կողմից ներառված է  ընտանիքում բռնության ենթարկված անձանց աջակցության կենտրոնների ծառայություններ մատուցող կառույցների ցանկում:

2021-ի խորհրդարանական ընտրություններից հետո Մատինյանի ՀԿ-ն ստորագրել էր մի հայտարարության տակ, որտեղ նշվում էր, որ ՀՀ կառավարությունը պետք է անհետաձգելի ջանքեր գործադրի ԵԱՀԿ Մինսկի խմբի գործունեությունը վերականգնելու համար։ Առանց դրա անհնար կլինի որևէ երաշխիք ունենալ` ապահովելու համար Արցախի և նրա քաղաքացիների անվտանգությունը և ինքնորոշման իրավունքի իրականացումը, կայուն և անժամկետ խաղաղության հաստատումը։ Հաշվի առնելով, որ կառավարությունը չի գործադրել այդ ջանքերը, իսկ Մատինյանը շարունակում է մնալ հեղափոխական թիմի անդամ և նույնիսկ ավագանու մանդատ է ստացել, կարո՞ղ ենք ենթադրել, որ վերջինս հրաժարվել է այն հայտարարությունից, որի տակ ստորագրել էր երկու տարի առաջ:

Ի դեպ, նախորդ տարվա հունիսի 5-ին՝ ի աջակցություն Բաց հասարակության հիմնադրամներ-Հայաստան գրասենյակի՝ 66 կազմակերպություններ հանդես էին եկել համատեղ հայտարարությամբ՝ դատապարտելով «Վետօ» նախաձեռնության գործողությունները։ Ստորագրողների թվում էր նաև Մատինյանի ՀԿ-ն: