«Միայնակ ընդդեմ ճակատագրի: Ֆուտբոլային դիվանագիտության հետնաբեմը». տեղի է ունեցել Սամվել Ֆարմանյանի գրքի շնորհանդեսը

Մարտի 24-ին տեղի է ունեցել մասնագիտությամբ պատմաբան, պատմական գիտությունների թեկնածու, ՀՀ երրորդ նախագահի մամուլի քարտուղար (2008-2010թթ.) Սամվել Ֆարմանյանի «Միայնակ ընդդեմ ճակատագրի: Ֆուտբոլային դիվանագիտության հետնաբեմը» գրքի շնորհանդեսը, որտեղ հեղինակը ականատեսի վկայություններով ներկայացնում է ֆուտբոլային դիվանագիտության ամբողջ ընթացքը։

Գրքի շնորհանդեսին ներկա է եղել նաև ՀՀ երրորդ նախագահ Սերժ Սարգսյանը:

Գրքում առաջին անգամ գաղտնազերծվում են նախագահ Սերժ Սարգսյանի բանակցությունները, որոնք 2008-2010թթ. նա վարել է Թուրքիայի նախագահ Գյուլի, վարչապետ Էրդողանի, Ֆրանսիայի նախագահ Սարկոզիի, ԱՄՆ նախագահ Օբամայի, պետքարտուղար Քլինթոնի և այլ պաշտոնյաների հետ։

Ներկայացվում է կարգավորման նախապատմությունը, աշխարհաքաղաքական կենտրոնների շահերի իրական քարտեզը, ներգրավված կողմերի իրարամերժ նպատակները, ինտրիգային հետնաբեմն ու որոշումների տրամաբանությունը։

Ֆարմանյանի կարծիքով, հուշագրությունը կօգնի հասկանալ հայ-թուրքական ու արցախյան հիմնախնդիրները, բացահայտել տարածաշրջանային իրողությունների պատճառահետևանքային կապերը՝ հասնելով մեր օրեր։

«Ուշադիր ընթերցողը կարող է ինքնուրույն բռնել պատճառահետևանքային կապերի այն «կարմիր թելը», որը հանգեցնելու էր Հայաստանում 2018թ․-ի իրադարձություններին և ածանցյալ աղետին։ Բոլորիս աչքի առաջ հանրային գիտակցության մանիպուլացիան, հիշողության կորուստը, պատմության ուրացումը կամ խեղաթյուրումը կարող է աղետի դուռը տանել աշխարհի բոլոր ժողովուրդներին։ Գիրքը շարադրելիս՝ նպատակս եղել է իմ տիրապետած տեղեկությունները՝ գաղտնազերծված տեղեկությունները, դարձնել հանրության սեփականությունը»,- նշել է գրքի հեղինակը:

Ինչո՞ւ և ինչպե՞ս սկիզբ առավ հայ-թուրքական գործընթացը։ Ի՞նչ ընտրության առաջ էր կանգնած Հայաստանը։ Ի՞նչ էր իրականում տեղի ունենում Նյու Յորքում, Դավոսում, Մյունխենում, Պրահայում, Ստամբուլում, Ցյուրիխում և Բուրսայում.. Այս և շատ այլ հարցերի պատասխանները հանգամանորեն ներկայացված է գրքում: