ՔՊ-ում հանգրվանած «նախկինների» ուշագրավ գնումները. Ռոբերտ Պետրոսյան

Կոտայքի մարզում ամենից երկար պաշտոնավարող համայնքապետը Ջրվեժի ղեկավար Ռոբերտ Պետրոսյանն է։ Նա համայնքը ղեկավարում է 31 տարի և սեպտեմբերի 25-ին տեղի ունեցած ՏԻ ընտրություններին գլխավորում էր «Քաղաքացիական պայմանագիր» կուսակցության համամասնական ցուցակը։

Պետրոսյանը 1991-1996 թթ. եղել է Ջրվեժի գյուղխորհրդի նախագահը։ Այնուհետև, 1996-ից Ջրվեժ համայնքի ղեկավարն է և, շարունակաբար, համայնքի ղեկավարի պաշտոնում վերընտրվել է 6 անգամ։ Նրա հարատևության գաղտնիքը կուսակցափոխ լինելու մեջ է։ 2005թ․-ի տեղական ինքնակառավարման մարմինների ընտրության ժամանակ նա առաջադրվել է որպես անկուսակցական թեկնածու, 2008 և 2012 թթ․ ընտրությունների ժամանակ եղել է «Բարգավաճ Հայաստան» կուսակցության (ԲՀԿ) անդամ: 2016-ին կրկին ինքնառաջադրվել է որպես անկուսակցական։ Ընտրվելուց մեկ տարի հետո՝ 2017թ.-ին, երբ Ջրվեժ համայնքը խոշորացվում էր և նոր ընտրություններ տեղի ունեցան, Ռոբերտ Պետրոսյանը ԲՀԿ անդամ էր և ինքնառաջադրվեց որպես խոշորացված համայնքի ղեկավար։

Այժմ, ինչպես տեսնում ենք, Պետրոսյանը հանգրվանել է ՔՊ ցուցակում և շարունակում է պաշտոնավարել: Իսկ ինչ հաջողություններ է նա արձանագրել այդ ընթացքում: Թերևս որևէ լուրջ ձեռքբերման մասին խոսելն ավելորդ է, իսկ ահա գնումների պլան մշակելիս համայնքապետը նույնքան առատաձեռն է գտնվել, որքան նախընտրական խոստումներ շռայլելիս: Ինչ արժե միայն 535 հազար դրամի թուղթ գնելը, դրան գումարած՝ 107 հազար դրամի ֆայլ, 30 հազար դրամի հիշողության ֆլեշ, 19 հազար դրամի գրասենյակային լրակազմ, 35 հազար դրամի նոթատետր, 38,400 դրամի դրոշներ,  100 հազար դրամի զուգարանի թուղթ, 99 հազար դրամի անձեռոցիկ,  2 միլիոն 700 հազար դրամի մարդատար ավտոմեքենա, 450 հազար դրամի համակարգիչ , 560 հազար դրամի տեխնիկական հսկողության ծառայություններ, 1 միլիոն  500 հազար դրամի տնտեսական ապրանքներ գնելը, ինչը ակնհայտ է, որ փոքր համայնքի համար բավական մեծ ծախս է: