Ծինփինի այցը Մոսկվա նվազեցրեց միջուկային պատերազմի վտանգը. Բորել

ԵՄ դիվանագիտության ղեկավար Խոսեպ Բորելը կարծում է, որ Չինաստանի նախագահ Սի Ծինփինի այցը Մոսկվա նվազեցրել է միջուկային պատերազմի վտանգը, գրում է Financial Times-ը։

«Կարևոր է, որ այս այցը կնվազեցնի միջուկային պատերազմ սկսելու վտանգը, և նրանք (Չինաստանի ներկայացուցիչները) դա շատ պարզ ասացին», - ասել է Բորելը` հիշեցնելով ուկրաինական ճգնաժամը լուծելու Չինաստանի ծրագիրը, որը վերաբերում է միջուկային զենքի կիրառման անթույլատրելիությանը։

Չինաստանի նախագահ Սի Ցզինպինը մարտի 20-22-ը պետական ​​այցով գտնվում էր Ռուսաստանում, որը նրա առաջին արտասահմանյան այցն էր պետության ղեկավարի պաշտոնում երրորդ ժամկետով վերընտրվելուց հետո։ Երկուշաբթի օրը Չինաստանի Ժողովրդական Հանրապետության նախագահը ոչ պաշտոնական հանդիպում է ունեցել ՌԴ նախագահ Վլադիմիր Պուտինի հետ, իսկ երեքշաբթի օրը կայացել են ռուս-չինական բանակցություններ՝ պատվիրակությունների մասնակցությամբ։

Չինաստանի իշխանությունները փետրվարին առաջարկեցին իրենց խաղաղության ծրագիրը։ Այն ներառում է 12 կետ, այդ թվում՝ հրադադարի կոչեր, անվտանգության ոլորտում բոլոր երկրների օրինական շահերի հարգում, Ուկրաինայում հումանիտար ճգնաժամի կարգավորում։ Ռուսաստանի նախագահ Վլադիմիր Պուտինի խոսքերով, չինական խաղաղության ծրագրի շատ կետեր կարելի է ընդունել՝ որպես կարգավորման հիմք, երբ պատրաստ լինեն դրան Արևմուտքում և Կիևում։