Ինչ ունեցվածք են հայտարարագրել Թալինի ավագանու ՔՊ-ական անդամները

Շարունակելով ընթերցողների ուշադրությանը ներկայացնել ՀՀ խոշոր համայնքների և քաղաքների ավագանու անդամների կողմից ներկայացված եկամտի և ունեցվածքի հայտարարագրերը՝ այսօր կանդրադառնանք Թալին քաղաքի ՔՊ-ական ավագանու անդամներից մի քանիսին:

Թալին համայնքի ղեկավարի տեղակալ Խաչատուր Տերտերյանը հայտարարագրել է երեք հողամաս և անհատական բնակելի տուն, 2013-ին ձեռք բերված OPEL մակնիշի ավտոմեքենա, տվյալ տարվա սկզբում առկա կանխիկ դրամը կազմել է 100,000.00 դրամ,  հաշվետու տարվա եկամուտները՝ 2,584,795.00 դրամ:

Թալին համայնքի ղեկավարի մյուս տեղակալ Սերգե Մկրտչյանը հայտարարագրել է 2008 թվականին ձեռք բերված բնակարան և 2021 թվականին ձեռք բերված հողամաս, ինչպես նաև 2013 թվականին ձեռք բերված MERCEDES-BENZ մակնիշի ավտոմեքենա, բանկային հաշիվներ մնացորդը կազմել է 250,000.00 դրամ, կանխիկ դրամը՝ 9,000,000.00 դրամ, եկամտի և ծախսերի վերաբերյալ որևէ տեղեկություն պաշտոնյան չի ներկայացրել:

Թալինի համայնքապետ Տավրոս Սափեյանի հայտարարագիրը գտնել այդպես էլ չհաջողվեց, թերևս վերջինս անչափ զբաղված է և հանրությանը հաշվետու լինելու ժամանակ պարզապես չի գտնում: Փոխարենը՝ ներկայացնենք Սափեյանի անվան հետ կապված վերջին սկանդալային պատմությունները: Պարզվում է՝ Թալինի քաղաքապետը պետական միջոցների հաշվին մոտ 10 մլն դրամանոց ավտոմեքենա է գնել: ԶԼՄ-ի ձեռքի տակ հայտնված պաշտոնական փաստաթղթից հայտնի դարձավ, որ ավտոմեքենան գնվել է ֆիզիկական անձ Տարոն Կարապետյանից՝ 9 մլն 700 հազար դրամով: Թալինի համայնքապետարանի աշխատակազմը գնումների փաստաթղթում «մոռացել է» նշել գնված ավտոմեքենայի մոդելը: Հավելենք, որ նախորդ տարվա սեպտեմբերի 27-ին Տավրոս Սափեյանը վթարի էր ենթարկվել Երեւանի Հրազդանի կիրճում: Ըստ ամենայնի, համայնքի ղեկավարը նոր մեքենայի կարիք ունի, քանի որ իր մեքենան դիմացի ավտոմեքենայի ուժգին հարվածից լուրջ վնասներ է կրել: