Գյուլագարակի «հեղափոխական» դարձած համայնքապետ Խաչիկ Վարդանյանի ուշագրավ գնումները

Հայաստանի 17 համայնքներում նախորդ տարվա սեպտեմբերի 25-ին, ինչպես գիտենք, տեղական ինքնակառավարման մարմինների ընտրություններ էին անցկացվում։ Ուշագրավ է, որ եթե նախկինում Նիկոլ Փաշինյանն ու իր թիմը ռեպրեսիաների միջոցով էին նախկին «տասովշչիկներին» աշխատեցնում իրենց օգտին, այժմ ՔՊ-ն  ներկայանում է ՀՀԿ-ի կարկառուն ընտրազեղծարարների դեմքով եւ նրանց իր ցուցակներում էր ներառել։ Մի շարք համայնքներում ՔՊ համամասնական ցուցակը գլխավորում էին կամ առնվազն այդ ցուցակում պատվավոր տեղեր էին զբաղեցնում տարիներ շարունակ  համայնքապետի պաշտոն զբաղեցրած եւ աղմկահարույց պատմություններով հայտնի անձինք։ Միայն այն փաստը, որ 2018-ից այս կողմ Նիկոլ Փաշինյանի իրավապահները գրեթե բոլոր համայնքապետերի դեմ գործեր հարուցեցին, եւ հիմա այդ անձինք նորից հավակնում են համայնքապետ ու ավագանի դառնալ, նշանակում է, որ ՔՊ-ն իր շարքերն է ընդգրկել նախկին «թալանչիներին», պաշտոնական դիրքերը չարաշահողներին կամ, ինչպես Փաշինյանը կասեր՝ «սերմացու գողացող մկներին»։

Գյուլագարակում ՔՊ թեկնածու, ներկայիս համայնքապետ Խաչիկ Վարդանյանն այդ պաշտոնում նշանակվել է 2021-ի հուլիսին, երբ 2017-ին համայնքապետ ընտրված Մհեր Գեւորգյանը վաղաժամկետ հրաժարական տվեց։ 2017-ի ընտրություններում ՀՀԿ-ական Խաչիկ Վարդանյանը պարտվել է Մհեր Գեւորգյանին և փաստացի ՔՊ ցուցակով ռևանշի հասավ իր վաղեմի հակառակորդի նկատմամբ:

Հասկանալու համար, թե ինչ բուռն աշխատանքային գործունեություն է ծավալել այս ընթացքում Վարդանյանը, այցելեցինք համայնքի պաշտոնական կայք: Սակայն, բացի պարգևատրումներից, խորհրդակցություններից, շնորհավորական ուղերձներից որևէ այլ ապացույցի, որ Վարդանյանը լծված է ի օգուտ համայնքի բեղուն աշխատանքի՝ չգտանք:

Փոխարենը` համայնքապետարանը անչափ ուշագրավ գնումներ է կատարել: Այսպես՝ Գյուլագարակ համայնքի Վարդաբլուր բնակավայրի մանկապարտեզի կառուցման աշխատանքների մրցույթը հաղթել է «Պապ և Դավիթ» ՍՊԸ-ն:

Մինչդեռ այս ընկերությունը հայտնվել էր ՊԵԿ թիրախում, քանի որ ուներ չկատարված հարկային պարտավորություններ: