ԱՄՆ-ն փոխհատուցում կվճարի Իրանին

2016 թվականի հունիսի 14-ին Իրանը հայց է ներկայացրել ԱՄՆ-ի դեմ՝ կապված Վաշինգտոնի կողմից ձեռնարկված միջոցների հետ, որոնք «խաթարում են իրանական իշխանությունների և ընկերությունների կարողությունը՝ իրականացնելու իրենց սեփականությունն արտասահմանում վերահսկելու իրավունքը»: Իրանը հայտարարել է, որ Վաշինգտոնն իր գործողություններով խախտել է 1955 թվականի օգոստոսի 15-ին ստորագրված Բարեկամության, տնտեսական հարաբերությունների և հյուպատոսական իրավունքների պայմանագրով նախատեսված որոշակի պարտավորություններ։ Այս մասին տեղեկանում ենք ՄԱԿ-ի մամուլի ծառայության հաղորդագրությունից։

«Այսօր Արդարադատության միջազգային դատարանի դատավորները վճիռ կայացրին այս գործով և համաձայնեցին Իրանի այն փաստարկների հետ, որ ԱՄՆ-ն խախտել է այս երկու պետությունների միջև Բարեկամության, տնտեսական հարաբերությունների և հյուպատոսական իրավունքների պայմանագրի մի շարք կետերով նախատեսված իր պարտավորությունները, որոնք ստորագրվել է Թեհրանում 1955 թվականի օգոստոսի 15-ին և ուժի մեջ է մտել 1957 թվականի հունիսի 16-ին։

Դատարանը գտնում է, որ ԱՄՆ-ը պարտավոր է փոխհատուցում վճարել Իրանի Իսլամական Հանրապետությանը միջազգային պարտավորությունների խախտման հետևանքների համար»,- ասված է ՄԱԿ-ի դատարանի որոշման մեջ։

 Արդարադատության միջազգային դատարանը որոշել է, որ Իրանին տրվող փոխհատուցման չափի հետ կապված հարցը կողմերի կողմից պետք է լուծվի այս որոշման օրվանից 24 ամսվա ընթացքում։ Բայց եթե կողմերը չկարողանան պայմանավորվել, ապա դատավորները կստանձնեն իրենց պարտականությունները, և նրանց «այդ նպատակով վերապահվում է գործի հետագա վարույթը»։

Արդարադատության միջազգային դատարանը, ՄԱԿ-ի կանոնադրության համաձայն, կազմակերպության վեց հիմնական մարմիններից մեկն է։ Այն հիմնադրվել է Սան Ֆրանցիսկոյում 1945 թվականի հունիսի 26-ին և սկսել է գործել 1946 թվականի ապրիլին։ Դատարանը իրավական վեճերը քննարկում է միայն պետությունների միջև և միայն այն դեպքում, եթե նրանք կամավոր ընդունում են նրա իրավասությունը: