Տեղի ունեցավ Համլետ Մարտիրոսյանի «Հայոց հնագույն պատմության էջեր» գրքի շնորհանդեսը

Համլետ Մարտիրոսյանի «Հայոց հնագույն պատմության էջեր» գրքի շնորհանդեսը տեղի ունեցավ այսօր Հայաստանի երիտասարդական հիմնադրամում։ Համլետ Մարտիրոսյանն ավելի քան 20 տարի զբաղվում է հայագիտությամբ։

Գիրքը հեղինակի չորրորդ հայագիտական աշխատությունն է, որը բաղկացած է չորս մասից։

«Հայոց հնագույն պատմության էջեր» գիրքն առաջինում՝ «Եդեմ երկրային և երկնային», հեղինակը միջագետքյան սեպագիր աղբյուրների և հայերենի տվյալների հիման վրա մեկնում է Եդեմի անվանումները, ճշգրտում Եդեմից բխող չորս գետերի սեպագիր աղբյուրներում և Հին կտակարանում հիշատակվող անվանումները։

Գրքի երկրորդ և երրորդ մասերում («Եդեմի արխիվը», «Հայկական նշանագրերի ուղին պալեոլիթից մինչև միջնադար») գրավոր վկայություններ են այն մասին, որ Սյունիքի ժայռապատկերները փորագրել են «նախաջրհեղեղյան նահապետները»։

Գրքի վերջին մասը՝ «Հիքսոսների առեղծվածը», նվիրված է հիքսոսներին, որտեղ, հնագիտական, դիցաբանական և լեզվաբանական տվյալների հիման վրա առաջ է քաշվում հիքսոսների հայկական ծագման վարկածը։

Գիրքը նախատեսված է ինչպես մասնագետների, այնպես էլ՝ ընթերցողների լայն շրջանակների համար։