ԱՄՆ-ն ժամանակին չհասկացավ, թե որքան կարևոր է Ուկրաինան Ռուսաստանի համար․ Foreign Policy

Հարվարդի համալսարանի միջազգային հարաբերությունների պրոֆեսոր, ամերիկյան Foreign Policy ամսագրի սյունակագիր Սթիվեն Ուոլթն իր հոդվածում գրել է, որ ԱՄՆ նախագահ Ջո Բայդենի վարչակազմի աշխատակազմը ժամանակին չի հասկացել, թե որքան կարևորություն է Ռուսաստանի Դաշնությունը տալիս հարևան Ուկրաինայում տեղի ունեցող իրադարձություններին և չկարողացան անել հնարավորը ռազմական գործողությունները դադարեցնելու համար։

Հեղինակը նշում է, որ ամերիկյան վարչակազմը «չհասկացավ, որ Ռուսաստանը Ուկրաինայի միտումները դիտարկում է որպես էքզիստենցիալ սպառնալիք»։ Նրա խոսքով՝ ԱՄՆ-ն չարեց ամեն ինչ՝ երկրում ռազմական գործողությունները կանխելու համար։

Քաղաքագետը նշել է, որ այլևս հնարավոր չէ իմանալ, թե արդյոք ռազմական գործողություններից կարելի էր խուսափել, «եթե ԱՄՆ-ն և նրա եվրոպացի դաշնակիցները փորձեին ավելի լուրջ և ստեղծագործաբար արձագանքել Ռուսաստանի անվտանգության մտահոգություններին», ինչպես նաև դադարեին պնդել, որ Ուկրաինան մի օր միանա Հյուսիսատլանտյան դաշինքին:

Բացի այդ, Ուոլթը հավելել է, որ ԱՄՆ նախագահի վարչակազմի հայեցակարգը, որն ուղղված է միջազգային քաղաքականության մեջ «ժողովրդավարությունն ընդդեմ ավտոկրատիայի» դիմակայությանը,  ավելի շատ խնդիրներ է ստեղծում ԱՄՆ դիվանագիտության համար, քան լուծում: