Սամվել Ալեքսանյանը այլևս ՔՊ-ի «սրտի օլիգարխը» չէ՞

Վերջին օրերին Նիկոլ Փաշինյանի և նրա սրտի օլիգարխ համարվող Սամվել Ալեքսանյանի հարաբերությունները, մեղմ ասած, լարված են: Ալեքսանյանը, կարծես, այլևս չի ցանկանում «բարեգործությամբ» զբաղվել, ինչն էլ չի վրիպել Նիկոլ Փաշինյանի սուր հայացքից:

Վերջերս  կառավարության նիստում որոշում կայացվեց, որով Սամվել Ալեքսանյանին պատկանող «Ալեքս տեքստիլ» ընկերությանը զրկեց զուգագուլպաների արտադրության համար նախկինում տրամադրված մաքսային արտոնությունից։

Ըստ հիմնավորման՝ ընկերությունը ներկայում չի կարողանում օգտվել վերոնշյալ արտոնությունից, քանի որ այդ գործունեության համար նախատեսված տարածքի շինարարական աշխատանքները դեռևս չեն ավարտվել, և ավարտի ժամկետը հայտնի չէ: Հիշեցնենք, որ գործարար Սամվել Ալեքսանյանի ընտանիքին պատկանող «Ալեքս Տեքստիլ» ընկերությունը 2021թ–ի որոշմամբ ազատվել էր 106 մլն դրամ մաքսատուրքից:

Այնուհետև ՄՊՀ-ն հանկարծ հիշեց, որ Սամվել Ալեքսանյանի հետ կապվող «Վեգա» ընկերությունը անբարեխիղճ մրցակցություն է մղում: Ինքը` Ալեքսանյանը, իհարկե, իրեն բնորոշ ոճով հերքում է, որ այս ընկերության սեփականատերն է, սակայն ինչպես ասում են` չկա ծուխ առանց կրակ, և մամուլը բազմիցս էր գրել, որ «Վեգան» պատկանում է հենց Սամվել Ալեքսանյանին:

Էկոնոմիկայի փոխնախարար Ռաֆայել Գևորգյանն էլ սկսել է այցելել տեքստիլ ոլորտում Սամվել Ալեքսանյանի փոքր, սակայն մրցակիցներին, մինչդեռ մինչ այս պահը նախարարությունը հիմնականում գովազդում էր հենց «Ալեքս Տեքստիլը»:

Սա էլ բավարար չէր՝ երկու օր առաջ ՊԵԿ-ն ու ՔԿ-ն են մտել Ալեքսանյանին պատկանող «Ալեքս տեքստիլ» և այստեղ խուզարկություններ իրականացրել: Նշենք, որ ըստ մամուլում շրջանառվող լուրերի` խուզարկությունը պայմանավորված է 1 ամիս առաջ «Նոր Զովքի» գործի շրջանակներում հայտնաբերված հետքի հետ, երբ սերվերներում բացահայտվել էին տեղեկություններ վերոնշյալ ընկերության կողմից հնարավոր ստվերային շրջանառության մասին։

Հեղափոխության օրերին Սամվել Ալեքսանյանը հայտարարում էր, որ Նիկոլը իրենց ախպերնա, իսկ հեղափոխությունից հետո դարձավ ոչ ավել ոչ պակաս՝ նոր իշխանությունների սրտի օլիգարխը: Սամվել Ալեքսանյանը հետհեղափոխական Հայաստանում ավելի շատ արտոնություններ է ստացել, քան ՀՀԿ-ի կառավարման տարիներին, այն ՀՀԿ-ի որի անդամ էր հանդիսանում և որի քվոտայով հայտնվել էր ԱԺ-ում: Այժմ, սակայն, իշխանությունների և Ալեքսանյանի ջուրը մեկ առվով չի հոսում, արդյո՞ք այս գործընթացները որոնք ընթանում են գործարարի անվան հետ կապվող բիզնեսների շուրջ, ինչ-որ կերպ կապ ունեն այն հանգամանքի հետ, որ նախորդ տարվա ընթացքում Ալեքսանյանը ոչ մի լումա չի փոխանցել Փաշինյանի ընտանեկան՝ «Իմ քայլը» հիմնադրամին: Բացի այդ էլ՝ զգալիորեն նվազեցրել է վճարվող հարկերը: Ինչպես երևում է՝ գործարարը ցանկանում է որոշակի դիստանցիա պահել Փաշինյանից և թիմից, ինչն էլ վերջիններիս կողմից արժանանում է հակաքայլի: Այսպիսով նախկին պաշտոնյային, կարծես, մղում են՝ բանալ քսակը և գնալ համագործակցության գործող իշխանությունների հետ...