ՄԱԿ-ում Ադրբեջանին կոչ են արել անհապաղ ապահովել Լաչինի միջանցքով ազատ տեղաշարժը

Ապրիլի 3-ին ՄԱԿ-ի հատուկ ընթացակարգերի մանդատ ունեցող հինգ անձինք հայտարարություն են տարածել՝ կոչ անելով Ադրբեջանի կառավարությանը հրատապ միջոցներ ձեռնարկել Լաչինի միջանցքով տեղաշարժի ազատությունն ու անվտանգությունն ապահովելու համար։

ՄԱԿ-ի փորձագետները, մասնավորապես, նշել են, որ Լաչինի միջանցքը Լեռնային Ղարաբաղը Հայաստանի և արտաքին աշխարհի հետ կապող միակ տրանսպորտային օղակն է և ունի մեծ հումանիտար նշանակություն։ Շրջափակումը խաթարել է սննդի, դեղորայքի, վառելիքի և այլ առաջին անհրաժեշտության պարագաների մատակարարումը Լեռնային Ղարաբաղում բնակվող մոտ 120 000 մարդկանց:

Հումանիտար իրավիճակը սրվել է գազի մատակարարման պարբերական ընդհատումների պատճառով, ինչը խաթարել է բուժհաստատությունների աշխատանքը։ Ուսումնական հաստատությունները նույնպես չեն կարողացել աշխատել և դադարեցրել են իրենց գործունեությունը։

ՄԱԿ-ի փորձագետները մտահոգություն են հայտնել առ այն, որ Լեռնային Ղարաբաղը արտաքին աշխարհին կապող միակ ճանապարհի շարունակական արգելափակումը խախտել է բնակչության իրավունքները և կարող է ծանր հումանիտար հետևանքներ ունենալ նրանց համար։