ՔՊ-ական պաշտոնյաների արտոնյալ ՀԿ-ները. Հակոբ Ասլանյան

Գաղտնիք չէ, որ այսօր բարձր պաշտոններ զբաղեցնող հեղափոխական չինովնիկների մեծ մասը մինչ հեղափոխությունը այս կամ այն ՀԿ նախագահ է եղել և զբաղվել է հասարակական գործունեությամբ, ասել է թե՝ ակտիվիստ է եղել: Վերջիններիս գլխավորած ՀԿ-ները, սակայն, այն ժամանակ հազիվ էին ծայրը-ծայրին հասցնում և որպես կանոն` անտեսված էին պետության կողմից: Հեղափոխությունից հետո այս առումով, անշուշտ, իրավիճակ է փոխվել և վերջիններիս կողմից ղեկավարած ՀԿ-ները դարձել են արտոնյալ:

Դեռեւս անցած տարվա հունվարին «Ազգային կամուրջ» ՀԿ-ն 5 տարի ժամկետով, անհատույց օգտագործման իրավունքով կառավարության կողմից Երեւանի կենտրոնում տարածք ստացավ։ Խոսքն Արշակունյաց պողոտա 4 հասցեում գտնվող տարածքի մասին է։ 

Դիցուք՝ Կառավարությունը որոշել է ՀՀ սեփականությունը հանդիսացող Երևանի Կենտրոն համայնքի Արշակունյաց պողոտայի 4 հասցեում գտնվող տարածքը 5 տարի ժամկետով անհատույց օգտագործման իրավունքով հանձնել ««Ազգային կամուրջ» ենթակառուցվածքների հզորացման և մարդկային ներուժի զարգացում» ՀԿ-ին: Կազմակերպության նպատակն է զարգացնել ու փորձարկել գիտակրթական ծրագրեր և ուսուցման նորարարական մոդելներ, ստեղծել «Նորարարական գաղափարների գեներացման կենտրոն» շնորհալի երեխաների և երիտասարդների համար: Բացի այդ, ՀԿ-ի ներկայացրած ծրագրի շրջանակում նախատեսում է իրականացնել ԱՄՆ-ից ՀՀ շտապօգնության, հրշեջ ծառայության մեքենաների և ավտոբուսների որոշակի քանակի ներկրում։

Պարզվում է, որ այս հասարակական կազմակերպության նախագահն Ազգային ժողովի ՔՊ-ական պատգամավոր Հակոբ Ասլանյանն է։ Այդ մասին նշում կա պատգամավորի՝ 2021 թվականի տարեկան հայտարարագրում։ Սակայն, այդպես էլ չհաջողվեց գտնել գեթ մեկ տեղեկատվություն առ այն, թե նման արտոնություններ ստանալուց հետո ինչ հաջողություններ է գրանցել սույն ՀԿ-ն; Չկա որևէ հիշատակում Ասլանյանի ղեկավարած հասակարակական կազմակերպության գործունեության մասին, առավել ևս հայտնի չէ՝ ինչ ճակատագրի են արժանացել շտապօգնության մեքենաները և ավտոբուսները, որոնք պետք է ներկրվեին, ներկրվել են արդյո՞ք, թե ոչ: Ըստ էության, Ասլանյանի ՀԿ-ն կառավարությունից խոշոր արտոնություն է ստացել՝ ոչինչ չանելու դիմաց...