ՔՊ-ական պաշտոնյաների ՀԿ-ները՝ արտոնյալ. Արսեն Թորոսյան

 Գաղտնիք չէ, որ այսօր բարձր պաշտոններ զբաղեցնող հեղափոխական չինովնիկների մեծ մասը մինչ հեղափոխությունը այս կամ այն ՀԿ նախագահ է եղել և զբաղվել է հասարակական գործունեությամբ, ասել է թե՝ ակտիվիստ է եղել: Վերջիններիս գլխավորած ՀԿ-ները, սակայն, այն ժամանակ հազիվ էին ծայրը-ծայրին հասցնում և որպես կանոն` անտեսված էին պետության կողմից: Հեղափոխությունից հետո այս առումով, անշուշտ, իրավիճակ է փոխվել և վերջիններիս կողմից ղեկավարած ՀԿ-ները դարձել են արտոնյալ:

Այսօր կանդրադառնանք առողջապահության նախկին նախարար Արսեն Թորոսյանի  «Իրական աշխարհ, իրական մարդիկ» ՀԿ-ին, որը ժամանակին ղեկավարել է անձամբ ինքը՝ Թորոսյանը: Այն համարվում է այսպես կոչված՝ սորոսական, և վերջին դրամաշնորհը Սորոսի գրասենյակից ստացել է 2017 թվականին: 

«Իրական աշխարհ, իրական մարդիկ» (Real world, real people) ՀԿ-ն 11 անգամ տարբեր տարիներին ստացել է դրամաշնորհներ, որոնց ընդհանուր գումարը կազմում է 283.117 ԱՄՆ դոլար։ Վերջին դրամաշնորհը, 25.000 ԱՄՆ դոլարի չափով, եղել է 2018 թվականի հուլիսին։

2016-2019թ․ թ․ «ԻԱԻՄ» ՀԿ-ն շարունակել է ծառայություններ տրամադրել ՄԻԱՎ-ով ապրող անձանց՝ ԲՀՀ-ի, ECUO-ի, AFEW-ի կողմից ֆինանսավորվող ծրագրերի շրջանակներում: Բացի Գլոբալ Հիմնադրամի կողմից ֆինանսավորվող ծրագրի «ԻԱԻՄ» ՀԿ-ն իր առջև դրված նպատակները կյանքի կոչելու համար բազմաթիվ դոնորների աջակցությամբ  իրականացրել է ծրագրեր: Այդ դոնորներն են` «Վորլդ Վիժն Հայաստան», ԵՄ, UNAIDS, UNDP, UNICEF, ԵՀԽ հայաստանյան Կլոր սեղան հիմնադրամ, ԲՀՀ, AFEW, ECUO:

Հեղափոխությունից հետո ՀԿ-ն ակտիվորեն մասնակցել է դրամաշնորհների մրցույթների: Երկու դրամաշնորհ ստացվել է ՁԻԱՀ-ի կանխարգելման հանրապետական կենտրոն ՊՈԱԿ-ից: Այսպես, դրանցից մեկի ծրագրային առաջարկը նախատեսում էր Հայաստանի Հանրապետության տարածքում ԹՆՕ–ների շրջանում ապահովել համայնքահեն ծառայությունների միջոցով կանխարգելիչ միջոցառումների հասանելիությունը, ՄԻԱՎ վարակի վաղ հայտնաբերումը և ՄԻԱՎ վարակի վերաբերյալ հետազոտությունների դրական պատասխանի դեպքում կատարել ուղղորդում և ուղեկցում ՁԻԱՀ-ի ԿՀԿ՝ հետագա հետազոտությունների և ՄԻԱՎ վարակ հիվանդության հայտնաբերման դեպքում դիսպանսերային հսկողության վերցնելու և բուժում տրամադրելու համար: Ծրագիրը պետք է իրականացվեր 2019-2021թթ. ընթացքում (ընդհանուր՝ 27 ամիս տևողությամբ) 5 խոշոր քաղաքներում՝ Երևանում, Գյումրիում, Վանաձորում, Կապանում և Արմավիրում: Երկրորդ դրամաշնորհային ծրագիրը ենթադրում է Հայաստանի Հանրապետության ողջ տարածքով տրամադրել խնամքի և աջակցության ծառայությունների փաթեթ՝ ՄԻԱՎ-ով ապրող մարդկանց: Ծրագիրը պետք է իրականացվեր 2019-2021 թթ. ընթացքում (ընդհանուր՝ 28 ամիս տևողությամբ) Հայաստանի Հանրապետության ողջ տարածքում: Երկու ծրագրերի համար, ըստ ՊԵԿ-ի, ՀԿ-ն ստացել է  62186999 ՀՀ դրամ: 

Քովիդ 19-ի դեմ պայքարում էլ Սորոսի հիմնադրամը համագործակցել էր սույն ՀԿ-ի հետ:

 «Իրական աշխարհ, իրական մարդիկ» ՀԿ-ն համագործակցում է նաև «Սվետոզառ» ՀԿ-ի հետ: Այդ ՀԿ-ի հիմնական թիրախային խմբերը գյուղաբնակ երիտասարդությունն ու կանայք են: ՀԿ-ն հիմնվել է 2017 թ. նոյեմբերին Արարատի մարզի Դվին գյուղում: Արարատի մարզում էլ իրականացրել է հետևյալ ծրագրերը՝ «Դեռահաս աղջիկների հիգիենա»՝ Արարատի մարզի 106 դպրոցում՝ «Իրական աշխարհ, իրական մարդիկ» ՀԿ աջակցությամբ, կազմակերպել է Արարատի մարզի 40 դպրոցների միջև աշակերտական ֆուտբոլի թիմերի առաջնություն՝ 40 համայնքների ՏԻՄ-երի աջակցությամբ: 

Փաստերը վկայում են, որ նախարար աշխատած ժամանակ Թորոսյանը և իր տեղակալ Լենա Նանուշյանն ակտիվորեն համագործակցում էին «Իրական աշխարհ, իրական մարդիկ» (Real world, real people) ՀԿ-ի հետ։