G7-ը ճնշում է գործադրում Ուկրաինայի վրա. Bloomberg

Յոթնյակի (G7) երկրները ճնշում են գործադրում Ուկրաինայի վրա, որպեսզի երկրի իշխանությունները շարունակեն բարեփոխումներ իրականացնել, որոնք կասեցվել էին ռազմական գործողությունների ընթացքում։ Խոսքը, մասնավորապես, պետության հզորացման, կոռուպցիայի դեմ պայքարի միջոցառումների մասին է։ Այս մասին գրում է Bloomberg-ը՝ վկայակոչելով անանուն եվրոպացի դիվանագետին։

Գործակալության տվյալներով՝ Արժույթի միջազգային հիմնադրամը մտավախություն ունի, որ օլիգարխները, որոնց գործունեությունը կոռուպցիայի հիմք է ծառայում, կարող են Ուկրաինայում իշխանության վերադառնալ։

Միաժամանակ, Ուկրաինայի Կենտրոնական բանկի նախկին ղեկավար Վալերիա Գոնտարևան ասել է, որ դոնորները վախենում են ոչ թե հին, այլ նոր օլիգարխներից։

Ապրիլի սկզբին ՆԱՏՕ-ի գլխավոր քարտուղար Յենս Ստոլտենբերգը Բրյուսելում կայացած մամուլի ասուլիսի ժամանակ ասել էր, որ դաշինքը ցանկանում է Կիևի հետ քննարկել ոչ միայն հրատապ ռազմական աջակցությունը, այլև կոռուպցիայի դեմ պայքարը, ազգային փոքրամասնությունների իրավունքները և բարեփոխումները։ Ուկրաինան պետք է կատարի այդ միջոցառումները՝ ռազմական բլոկին միանալու համար։