Փաշինյանի թիմակիցները զրոյացնում են վարչապետի «աննախադեպ ցուցանիշները»

Օրեր առաջ հրապարակվել է բրիտանական Legatum Prosperity Index հետազոտությունը, որը վերաբերում է 2023 թվականի՝ երկրների բարեկեցության ցուցանիշներին:  Հայաստանի դիրքերը 2022 թվականի զեկույցի համեմատ վատթարացել են և զբաղեցրած 59-րդ հորիզոնականից Հայաստանը տեղափոխվել է 61-րդ հորիզոնական: Միաժամանակ շատ ավելի հետաքրքրական է վերլուծել Հայաստանի ներկա վիճակն` ըստ հիմնական ուղղությունների, տվյալների և պարամետրերի:

Վատացել է իրավիճակն անձնական ազատությունների և կառավարման ոլորտում, հատկապես սոսկալի է՝

* քաղաքական հաշվետվողականության ցուցանիշի անկումը,

* ինստիտուցիոնալ վստահությունը կառավարման մարմինների նկատմամբ

Իսկ ովքե՞ր են նպաստել իրենց ոչ թափանցիկ աշխատելաոճով, որպեսզի նվազի հաշվետվողականության ցուցանիշը, իսկ կառավարման համակարգի հանդեպ վստահությունը պարզապես գահավիժի:

Այդ պաշտոնյաների թվում, անշուշտ, կարելի է շեշտել ԱԽ քարտուղար Արմեն Գրիգորյանին: Ամիսներ առաջ Անվտանգության խորհրդի քարտուղար Արմեն Գրիգորյանը հայտարարեց, որ մինչև այս պահը Հայաստանն ու Ադրբեջանն անկլավների հարց չեն քննարկել: «Մինչև այս պահն անկլավների հարց չի բարձրացվել: Կարելի է ասել, որ երկու կողմից էլ (Հայաստանի և Ադրբեջանի- խմբ)անկլավ կա, և դրանց տարածքները գրեթե հավասար են, երկու կողմն էլ լուռ է այս հարցում և այն դեռևս չի  քննարկվել: Մեր հույսն այն է և հնարավոր լուծման տարբերակն այն է, որ  Հայաստանի անկլավը թողնվում է Ադրբեջանին, Ադրբեջանի անկլավները, որոնք Հայաստանի տարածքում են, մնում են Հայաստանին: Իհարկե, կա այսպիսի հարց, թե ինչպես են դրանք առաջացել, որոնք շարունակում ենք ուսումնասիրել, բայց ընդհանուր երկարաժամկետ տարբերակը սա է»,- ասել է Գրիգորյանը։ Մինչդեռ ուշագրավ է, որ դրանից առաջ Գրիգորյանը այլ հայտարարություններով էր հանդես գալիս: Մասնավորապես, Արմեն Գրիգորյանը 2021 թվականի դեկտեմբերի 21-ին հայտարարել է՝ անկլավների հարց չկա, քանզի մեր ուսումնասիրությունները ցույց են տվել, որ Հայաստանի տարածքում անկլավներ չկան: «Եղել են սովետական շրջանում տարբեր տարիներին տարբեր սովխոզների միջև տարածքների փոխանակում, բայց դրանք անկլավներ չեն: Ուստիև, կարծում եմ, որ սահմանազատման և սահմանագծման գործընթացի արդյունքում Հայաստանի ներկայիս սահմանները առանձնապես չեն փոխվի, քանզի անկլավների հարց ՀՀ տարածքում առկա չէ, կա Արծվաշենի անկլավի հարցը, որը ներկայումս գտնվում է Ադրբեջանի տարածքում»,- հավաստել էր Անվտանգության խորհրդի քարտուղարը:

Ոչ թափանցիկ էր ընթանում համավարակի դեմ պատվաստման գործընթացը:  Այն, որ պատվաստման վերաբերյալ Անահիտ Ավանեսյանի գերատեսչության ներկայացրած թվերը ամբողջական չեն, առաջին անգամ բարձրաձայնեց Նիկոլ Փաշինյանը՝ կառավարության հուլիսի 22-ի նիստին։ Նա նախարարությանը հանձնարարեց ամենօրյա ռեժիմով վիճակագրություն ներկայացնել, ընդ որում՝ առանձնացնելով օրվա կտրվածքով Հայաստանում պատվատսվող արտասահմանցիների թիվը. «Ես կուզենայի, որ ամենօրյա վիճակագրության մեջ առանձնացնենք հայաստանցիների և օտարերկրացիների թիվը: Պայմանավորվել ենք, որ հայաստանցիների օրական պատվաստումների առնվազն 5000 տեմպը պետք է պահենք»,- ասել էր Փաշինյանը։ Առողջապահության նախարարությունն այս հանձնարականը չկատարեց սահմանված ժամկետում, ինչպես նաև չէր հրապարակում օրական պատվաստումների կառուցվածքում օտարերկրացիների թիվ՝ հայտարարելով, թե այդ վիճակագրությունը «ամփոփվում և հրապարակվում է ամսական կտրվածքով», այնինչ պատվաստումային գործընթացը Հայաստանում սկսվել է ապրիլի կեսից։

Ինչու պետք է հասարակությունը վստահի պետական համակարգին, եթե դիցուք՝ Գորիս-Կապան ճանապարհը փակվելու նույն օրը ՔՊ-ական պատգամավոր Նարեկ Ղահրամանյանը հայտարարում է, որ իր տվյալներով ճանապարհը կբացվի մինչ երեկո, իսկ այնուհետև, երբ այդպես, բնականաբար, չի պատահում, նա անգամ ներողություն չի խնդրում հանրությանը կեղծ հույսեր տալու և ապակողմնորոշելու համար:

Վարչապետ Նիկոլ Փաշինյանի դասընկեր, նրա հարսանիքի քավոր, Նիկոլ Փաշինյանի որոշմամբ 2021թ․ ապրիլի 8-ին Տավուշի մարզպետ նշանակված Հայկ Ղալումյանը ժամկետային զինվորական ծառայություն չի անցել։ Նրան տեղեկատվական հարցում եմ ուղարկել, հարցնելով, թե ինչ պատճառով նա բանակում չի ծառայել։ Իսկ երբ ԶԼՄ-ը փորձել են պարզել պատճառը, գրավոր հետևյալ պատասխանն են ստացել․ «Տավուշի մարզպետ Հայկ Ղալումյանը պարտադիր զինվորական ծառայությունից ազատվել է տվյալ ժամանակահատվածում գործող օրենքի պահանջներին համապատասխան»։ Մարզպետը, ըստ էության, թաքցրել է բանակում իր չծառայելու պատճառը։

Ակնհայտ է, որ Նիկոլ Փաշինյանի թիմակիցներն իրենց կողմից ամեն բան արել են, որպեսզի Հայաստանը հետընթաց արձանագրի վերը նշված պարամետրերով, մինչդեռ հեղափոխության օրերին հանրությանը խոստանում էին աննախադեպ թափանցիկություն և հաշվետվողականություն...