Էրդողանը կոչ է արել կանխել Պաղեստինի և Իսրայելի միջև էսկալացիայի նոր ալիքը

Թուրքիան անհանգստացած է Պաղեստինի և Իսրայելի շուրջ իրավիճակի վատթարացմամբ, հայտարարել է Թուրքիայի նախագահ Ռեջեփ Թայիփ Էրդողանը, փոխանցում է ՏԱՍՍ-ը։ Նրա խոսքով՝ Անկարան կոչ է անում համաշխարհային հանրությանը օգնել պաշտպանել Երուսաղեմի կրոնական սրբավայրերի կարգավիճակը` Ալ-Աքսա մզկիթում Իսրայելի անվտանգության ուժերի գործողություններից հետո։

«Անհրաժեշտ է ողջախոհություն ցուցաբերել՝ էսկալացիայի նոր ալիքը կանխելու համար։ Միջազգային հանրությունը՝ ՄԱԿ-ի և Իսլամական համագործակցության կազմակերպության գլխավորությամբ, պետք է ջանքեր գործադրի բոլոր հարթակներում՝ կրոնական սրբավայրերի կարգավիճակը պաշտպանելու համար»,- ասել է Էրդողանը:

Ինչպես նշվում է, նա համապատասխան հայտարարությունն արել է իր իրանցի գործընկեր Էբրահիմ Ռաիսիի հետ զրույցում։ Երկու առաջնորդների հեռախոսազրույցը կայացել է ապրիլի 7-ին, մասնավորապես, իսրայելա-պաղեստինյան դիմակայության սրման ֆոնին։

Էրդողանը նաև նշել է դիրքորոշումների միասնականության անհրաժեշտությունը իսլամաֆոբիայի դրսևորումներին հակազդելու հարցում, ներառյալ Ղուրանի օրինակների այրումը, որոնք վերջերս տեղի են ունեցել եվրոպական մի շարք քաղաքներում թուրքական դեսպանատների մոտ։