Ադրբեջանն ու Ղազախստանը քննարկում են 5 մլն տոննա նավթի փոխադրման հարցը. Reuters

Ադրբեջանն ու Ղազախստանը քննարկում են 2023 թվականին Բաքու-Սուփսա նավթամուղով 5 միլիոն տոննա ղազախական նավթ տեղափոխելու հնարավորությունը, Reuters-ին հայտնել են բանակցություններին ծանոթ երեք աղբյուրներ։

«Ադրբեջանական կողմն առաջարկել է հինգ միլիոն տոննա նավթ տեղափոխել Բաքու-Սուփսայով... այս հարցը բանակցությունների առարկա է»,- Reuters-ին ասել է աղբյուրը։ Երկու այլ աղբյուրներ հաստատել են այս տեղեկությունը։

Ըստ տեղեկությունների՝ հնարավոր է, որ նավթամուղը նավթ տեղափոխի Քաշագանի հանքավայրից։

Ադրբեջանը, ըստ աղբյուրների, Ղազախստանին առաջարկել է նաև նավթի փոխադրում Վրաստանի սևծովյան նավահանգիստներով։

Ղազախստանը փորձում է, Ռուսաստանը շրջանցելով, մեծացնել նավթի արտահանումը՝ ձգտելով դիվերսիֆիկացնել մատակարարումները, ինչի մասին նախագահ Կասիմ-Ժոմարտ Տոկաևը խոսել է 2022 թվականի ամռանը։ Այնուամենայնիվ, առայժմ Կասպյան խողովակաշարի կոնսորցիումը (CPC) մնում է արտահանման հիմնական ուղին, որն ավարտվում է Նովոռոսիյսկի մոտ գտնվող Յուժնայա Օզերեևկա ռուսական ծովային տերմինալով, իսկ այլընտրանքային մատակարարումների բաժինը փոքր է։