Մութ ամպեր՝ Անահիտ Ավանեսյանի գլխավերևում. «կզոհաբերի՞» նրան Փաշինյանը Ռոմանոս Պետրոսյանի ձեռքերով

Ամիսներ առաջ ՊՎԾ ղեկավար Ռոմանոս Պետրոսյանը նախորդ օրը Հանրային հեռուստաընկերության եթերում ինքնախոստովանություններով հանդես եկավ, թե ինչպես են հետհեղափոխական ժամանակահատվածում Պետական առողջապահության գործակալությունում՝ ՊԱԳ-ում, գրանցվել կոռուպցիոն բնույթի սկանդալներ:

Ռոմանոս Պետրոսյանը հայտարարեց. «Եթե պետական մարմիններում վերահսկողական մարմինները հավուր պատշաճի գործեն, ՊՎԾ-ն անելիք չի ունենա: ՊԱԳ-ով տրված պետպատվերների ձեւավորման հայտերի ներկայացման եւ ֆինանսավորման գործընթացի մասով կան բավականին լուրջ ընթացակարգային խնդիրներ, իսկ որտեղ ընթացակարգային եւ օրենսդրական բացեր կան, այնտեղ ակտիվանում են անբարեխիղճները, բույն է դնում կոռուպցիան, ցավոք»:

Մինչ այդ հարցազրույցը առողջապահության նախարար Անահիտ Ավանեսյանը հայտարարում էր, որ  Պետական առողջապահական գործակալությունը կարևոր դեր է ստանձնելու առողջության համապարփակ ապահովագրության համակարգի ներդրման ճանապարհին: Նա նաև նշում էր, որ կառույցը գտնվում է բարեփոխումների փուլում, բարեփոխողն էլ, ըստ էության, ինքն է՝ Ավանեսյանը: Ստացվում է, որ Ռոմանոս Պետրոսյանն անուղղակիորեն քար է նետում Ավանեսյանի այգին` հայտարարելով, որ այդ բարեփոխումները, մեղմ ասած, արդյունավետ չեն եղել և այստեղ վխտում է կոռուպցիան: Այսինքն` Ավանեսյանը կամ այդ կոռուպցիան չի նկատել, կամ շատ ավելի վատ ենթադրությունների տեղիք կարող է տալ այս ամենը: ՊՎԾ-ն դեռևս չի ավարտել մեկ այլ ուսումնասիրություն` կապված առողջապահության նախարարության կողմից Քովիդի դեմ պայքարի համար նախատեսված գումարների ոչ նպատակային ծախսերի հետ և չի բացառվում, որ այստեղ էլ նախարարի գլխին մութ ամպեր կուտակվեն: 

Ավելին, Դեկտեմբերի 1-ից ՊՎԾ-ն ընդլայնել է իր ներգրավվածությունը մեծածավալ շինարարական ծրագրերի վերահսկողության գործում, իսկ ԲԿ-ների կապիտալ շինարարությունն ավելի քան մեծածավալ է: Փաստացի, այստեղ ևս կարող են խախտումներ ի հայտ գալ, ինչը նշանակում է, որ Անահիտ Ավանեսյանի գլխին իսկապես մութ ամպեր են կուտակվում: Մամուլում վերջին շրջանում համառ տեղեկություններ էին տարածվում, որ Փաշինյանի հաջորդ զոհը դառնալու է հենց Ավանեսյանը, եթե ՊՎԾ ուսումնասիրությունները վեր հանեն լուրջ խախտումներ, ապա այս հանգամանքը կարող է հարմար առիթ դառնալ Փաշինյանի համար՝ Ռոմանոս Պետրոսյանի ձեռքերով Անահիտ Ավանեսյանին զոհաբերելու: