ՔՊ-ականների հակասական հայտարարությունները. Նիկոլ Փաշինյան vs Արսեն Թորոսյան

Վերլուծական 14 Ապրիլ, 2023 20:03

Հայաստանյան քաղաքական դաշտում հաճախ կարելի է հանդիպել մի իրավիճակի, երբ բարձրագույն իշխանության ներկայացուցիչների, մասնավորապես՝ վարչապետի հայտարարություններին հակասող հայտարարություններ են հնչում, իսկ հաճախ դրանք նույնիսկ հերքվում են: Ուշագրավն այն է, որ Նիկոլ Փաշինյանի հայտարարությունները կամա թե ակամա կասկածի տակ առնող պաշտոնյաները հենց իր թիմակիցներն են:

Դիցուք՝ 2020 թվականի մարտի 26-ի կառավարության կայացած նիստին վարչապետ Նիկոլ Փաշինյանը հայտարարեց, որ Հայաստանում արդեն իսկ կան կորոնավիրուսի հայտնաբերման արագ թեստեր և դրանք պետք է օգտագործվեն Արցախում մարտի 31-ին սպասվող ընտրություններին Հայաստանից մեկնող դիտորդական առաքելությունների անդամներին մեկնումից առաջ թեստավորելու համար։

«Մենք այսօր արդեն ունենք հանրապետությունում կորոնավիրուսի արագ թեստեր»,- հայտարարեց Փաշինյանը։

Հատկանշական է, որ ընդամենը մեկ օր առաջ՝ մարտի 25-ին, Ազգային ժողովում կառավարության հետ հարցուպատասխանի ժամանակ առողջապահության նախարար Արսեն Թորոսյանը հայտարարել էր, որ կորոնավիրուսի արագ ախտորոշման թեստերը պատվիրվել են, բայց դեռևս հանրապետություն չեն հասել։

«Այո՛, մենք ձեռք ենք բերել այդ թեստերը ինքներս մեր սեփական փորձով համոզվելու համար՝ ինչպե՞ս պետք է կիրառենք, ո՞ր հաստատություններում…։ Թեստերը ճանապարհին են, մենք ամեն օր սպասում ենք։ Մի խմբաքանակի նախնական առաքման ժամկետն ամսի 27-ն է, բայց գիտենք, որ համաշխարհային լոգիստիկ խնդիրներ կան՝ ինքնաթիռների թռիչք, փակ ցամաքային սահմաններ…»,- ասել էր նա։

Արսեն Թորոսյանը նաև նշել էր, որ մինչև հիմա Հայաստանում կիրառվում է Առողջապահության համաշխարհային կազմակերպության կողմից հաստատված և խորհուրդ տրվող կորոնավիրուսի ախտորոշման՝ PCR պոլիմերազային շղթայական ռեակցիայի մեթոդը, որը կիրառվում է ամբողջ աշխարհում։ Ըստ Թորոսյանի՝ այս մեթոդով ախտորոշումը տևում է մոտ 5 ժամ, սակայն այն գերճշգրիտ է։

Այն բանից հետո, երբ Արսեն Թորոսյանը արդեն լքել էր առողջապահության նախարարի պաշտոնը վերջինս ևս մեկ անգամ հակասեց Փաշինյանի կողմից առաջ քաշված թեզին: Գաղտնիք չէ, որ ընդդիմությանը մանդատներից զրկելու թեման առանց վերադասի հետ համաձայնեցման և վերջինիս դաբռոյի՝ օրակարգ չէր մտնի: Մինչդեռ ահա թե ինչ էր ասում այդ հարցի վերաբերյալ ԱԺ պատգամավոր Արսեն Թորոսյանը՝ «Ես չգիտեմ, թե ինչու է արվում և ով է անում այդ քարոզչությունը, բայց ընդդիմությունը մանդատներից չի զրկվի։ Սա ընդամենը գործընթաց է»։

Վերջերս էլ բավական ցայտուն կերպով արտահայտվեցին երկու ՔՊ-ականների միջև եղած առկա հակասությունները: Մինչ Փաշինյանը հայտարարում է, որ այնպես է բարեփոխել իրավապահ ու դատական համակարգը որ անմեղ մարդկանց մեղադրանք ներկայացնելը գրեթե անհնար է, այնպես է բարեփոխել պետական կառավարման համակարգը, որ կոռուպցիան վերացել է, Արսեն Թորոսյանը գրառում է անում, որտեղ շեշտում է, որ ոչ մի լավ բան այս երկրում անպատիժ չի մնում և որ չի զարմանա, եթե իրեն վաղը մեղադրեն Քովիդի ժամանակ Չինաստանից թթվածնի կայաններ ինքնաթիռներով Հայաստան հասցնելու կամ Ռուսաստանից ու Վրաստանից հեղուկ թթվածին ներկրելու մեջ, չէ որ կովիդն արդեն անցել է և մեղադրողներն արդեն մաքուր թթվածնի կարիք չունեն: Բացի այդ, նա նշել է, որ իրեն հարուցված քրեական գործի շրջանակներում չեն հարցաքննել, ավելին՝ ակնարկում է, որ հետագայում էլ կարող է ինչ-ինչ բացահայտումներ անել կոռուպցիոն դրվագների վերաբերյալ՝ փաստելով, որ դրանք, այնուամենայնիվ ի հեճուկս Նիկոլ Փաշինյանի, արձանագրվել են: