Գերմանիան զգուշացրել է Չինաստանին Թայվանի հետ պատերազմի դեպքում աղետալի հետեւանքների մասին

Չինաստանի և Թայվանի միջև հնարավոր պատերազմը կլինի ամենավատ սցենարը ողջ աշխարհի համար և կունենա աղետալի հետևանքներ։ Այս մասին Չինաստան կատարած պաշտոնական այցի ժամանակ համատեղ մամուլի ասուլիսի ժամանակ զգուշացրել է Գերմանիայի արտաքին գործերի նախարար Անալենա Բերբոքը, գրում է Politico-ն։

Քաղաքական գործիչը սարսափելի սցենար է անվանել տարածաշրջանում ռազմական էսկալացիան, քանի որ այն կհանգեցնի համաշխարհային տնտեսական ճգնաժամի, որը կազդի նաև Չինաստանի և Գերմանիայի վրա։ «Մենք մեծ մտահոգությամբ ենք հետևում Թայվանի նեղուցում աճող լարվածությանը», - հավելել է Բերբոքը:

Գերմանիայի ԱԳՆ ղեկավարը կոչ է արել հակասությունները կարգավորել բանակցությունների միջոցով։ Նա ընդգծել է, որ «ստատուս քվոյի միակողմանի և բռնի փոփոխությունն անընդունելի կլինի եվրոպացիների համար»:

Գերմանիայի արտգործնախարարը պաշտոնական այցով Չինաստան է ժամանել ապրիլի 13-ին։ Ավելի վաղ Politico թերթը հայտնել էր, որ Բերբոքը կայցելի Չինաստան՝ Պեկինի հետ հարաբերություններում «ճշմարտությունը հաստատելու» և Թայվանի հարցում ԵՄ դիրքորոշումը հստակեցնելու համար։