Մենք չենք ընդունի Սիրիայից մեր զորքերը բանակցությունների համար դուրս բերելու պայմանը․ Չավուշօղլու

Թուրքիայի արտգործնախարար Մևլութ Չավուշօղլուն հայտարարել է, որ Անկարան չի ընդունի որևէ նախապայման Սիրիայի ղեկավարության հետ ուղիղ բանակցությունների համար, այդ թվում՝ իր զորքերը Սիրիայի տարածքից դուրս բերելու համար։ Այս մասին հաղորդում է ՏԱՍՍ-ը։

«Ապագայում հնարավոր են շփումներ Սիրիայի հետ, բայց դեռ շատ աշխատանք է պետք անել: Եվ մենք չենք ընդունի որևէ նախապայման: Մենք չենք ընդունի Սիրիայից մեր զորքերը բանակցությունների համար դուրս բերելու պայմանը: Մենք կհեռանանք, և նորից սպառնալիքներ կսկսվեն մեր դեմ», - ասել է նա հինգշաբթի Habertürk հեռուստաալիքի եթերում։

Թուրք նախարարը հիշեցրել է, որ ավելի վաղ ձեռք բերված պայմանավորվածությունների համաձայն՝ Դամասկոսը պետք է վերացներ Թուրքիայի դեմ սահմանային բոլոր սպառնալիքները, սակայն Անկարան դեռ տեսնում է դրանք։ Խոսքը Սիրիայի հյուսիսում քրդական խմբավորումների գործունեության մասին է, որոնք Թուրքիայում ճանաչված են որպես ահաբեկչական։