ՔՊ-ականների հակասական հայտարարությունները. Նիկոլ Փաշինյան vs Վահան Քերոբյան

Հայաստանյան քաղաքական դաշտում հաճախ կարելի է հանդիպել մի իրավիճակի, երբ բարձրագույն իշխանության ներկայացուցիչների, մասնավորապես՝ վարչապետի հայտարարություններին հակասող հայտարարություններ են հնչում, իսկ հաճախ դրանք նույնիսկ հերքվում են: Ուշագրավն այն է, որ Նիկոլ Փաշինյանի հայտարարությունները կամա թե ակամա կասկածի տակ առնող պաշտոնյաները հենց իր թիմակիցներն են:

Տնտեսական ոլորտի աճպարարություններն ու թվային տվյալների խեղաթյուրումները հասել են այն աստիճանի, որ ոլորտի տարբեր պատասխանտուներն սկսվել են հակադրվել մեկը մյուսին եւ այս պարագայում փորձել պարզել, թե ո՞ր մեկն է ո՞ր չափով ստում` գործնականում անհնար է։

Դիցուք՝ եթե Փաշինյանը պնդում է, որ գյուղատնտեսությունը այն եզակի ճյուղերից է, որ լայն թափով աճ է արձանագրում, ապա էկոնոմիկայի նախարար Քերոբյանը հենց կառավարության նիստի ընթացքում Փաշինյանին մեղադրում է ստախոսության մեջ՝ պնդելով, որ որևէ նշանակալից աճ ոլորտը չի արձանագրել:

Սա նախարարի և վարչապետի առաջին հակասությունը չէ: Եթե Փաշինյանը պնդում է, որ տնտեսությունը առողջանում է, իսկ բիզնեսը պատշաճ աջակցություն է ստանում պետությունից, ապա նախարարը իր հարցազրույցի ընթացքում հայտարարում է, որ բիզնեսի վիճակը Հայաստանում ծայրաստիճան վատ է: Մյուս կողմից էլ՝ Քերոբյանը հաջողում է հակասել նաև ինքն իրեն. մի կողմից նա հայտարարում է, որ ներդրողների հերթ է գոյացել՝ Հայաստանում համապատասխան ինվեստիցիաներ անել ցանկացողներից, մյուս դեպքում հայտարարում է, որ Հայաստանում տնտեսական ճգնաժամը կարող է դեռ երկար ձգվել: 

Մեկ այլ օրինակ՝ կառավարության նիստի ժամանակ Փաշինյանը հայտարարում էր, որ երկնիշ տնտեսական աճը այլևս ֆանտաստիկայի ժանրից չէ:

Իսկ ահա Վահան Քերոբյանը դրանից մի քանի շաբաթ անց առաջարկեց սպասել մինչև թվերը կամփոփվեն և պարզ կլինի, թե ինչքան է կազմել իրական տնտեսական աճը և նշեց, որ իրական տնտեսական աճը հաստատ 10 տոկոսից ավել չի լինի։ Իրական տնտեսական աճը, ըստ Քերոբյանի, երկնիշ չի լինի։