Պայքար Վանաձորի համար. ՔՊ-ականներից ովքեր են ցանկանում «վերցնել» քաղաքը

Իշխանական շրջանակներում քննարկում են Վանաձորում արտահերթ ընտրություններ անցկացնելու հարցը։ Բանն այն է, որ տեւական ժամանակ է՝ ավագանու նիստեր չեն գումարվում, քաղաքում կուտակված խնդիրներ կան, որոնք միայն ավագանու որոշումներով են լուծվում։ Մամիկոն Ասլանյանի  թիմակիցը, որը քվորում ապահովեց, եւ ՔՊ-ի համայնքապետ Ական՝ Արկադի Փելեշյանը, հաստատեց համայնքի բյուջեն, այդ նիստից հետո այլեւս չի ներկայանում նիստերին, ուստի նոր ընտրություններ են պետք, դրա համար իրավական ճանապարհներ են փնտրում։ Քննարկվում է Վանաձորի կրկին խոշորացման՝ Փամբակը Վանաձորին միավորելու հարցը, որի դեպքում նոր ընտրություն կկայանա։

Հիշեցնենք, որ իշխող ՔՊ խմբակցությունը, իբրև խնդրի լուծում, արտահերթ նիստով փոփոխություններ կատարեց ՏԻՄ մասին օրենքով, որով վարչապետին համայնքապետի ԺՊ նշանակելու լիազորություն տրվեց, ինչից հետո Նիկոլ Փաշինյանի որոշմամբ՝ Արկադի Փելեշյանը նշանակվեց Վանաձորի համայնքապետի պաշտոնակատար: Բայց, ինչպես երևում է, հայտնի Ակկան էլ իր կապերով չի կարողանում օգնել ՔՊ-ին: Մինչդեռ Փաշինյանի և ՔՊ-ի ստավկան հենց դրա վրա էր, որ վերջինս իր կիսաքրեական կապերով, ռեսուրսներով կօգնի համայնքը իրենցով անելու գործում, այն էլ Փելեշյանը տապալեց առաջին իսկ քննությունը

Անշուշտ, որքան էլ որ զավեշտալի չհնչի, սակայն այս իրավիճակում ակնհայտորեն փառավորվում է Լոռու մարզպետ Արամ Խաչատրյանի հոգին, քանի որ վերջինս էր հենց Վանաձորում ՔՊ քաղաքապետի թեկնածուն, սակայն ընտրություններում պարտվելուց հետո Փաշինյանը նրան այլևս չվստահեց և նախընտրեց Փելեշյանին: Այժմ, երբ Փելեշյանը չի արդարացնում Փաշինյանի հույսերը, մարզպետը կարող է օգտվել ստեղծված իրավիճակից և արդեն իր յուրայինին առաջ քաշել որպես Վանաձորի համայնքապետի թեկնածու: Հատկապես, որ հեղափոխությանը մասնակցած այսպես կոչված՝  գաղափարական ՔՊ-ի շրջանում դժգոհություն է առաջանում այն կապակցությամբ, որ բարձր պաշտոններ են ստանում ոչ թե իրենք, այլ նախկիների հետ ինչ-ինչ կապեր ունեցող անձինք:

Բնականաբար, ձեռքերը ծալած չի նստելու և ինքը՝ Փելեշյանը, ով այս ընթացքում թերևս հասցրել է որոշակի թիմ հավաքել և նույնպես չի հրաժարվելու համայնքապետի պաշտոնում արդեն ոչ թե նշանակվելու, այլ ընտրվելու ամբիցիաներից:  

Մարզում դեռևս իր ազդեցությունն է պահպանում նաև Լոռիի նախկին մարզպետ Անդրեյ Ղուկասյանը, ում ՔՊ-ն հեռացրեց պաշտոնից փոխարինելով հենց Արամ Խաչատրյանով: Վանաձորի ընտրություններում յուրայինին առաջ մղելու և որպես թեկնածու անցկացնելու հնարավորությունը լավ շանս է ռեաբիլիտացվելու և մարզում իշխանական լծակները ընդլայնելու համար:

Ըստ էության, եթե ի վերջո իշխանությունները որոշում կայացնեն Վանաձորում արտահերթ ընտրություններ անցկացնելու մասով, ապա հիմնական պայքարը ընթանալու է այս երեք թևերի միջև, իսկ եթե ում յուրայինը ի վերջո կշահի Փաշինյանի սիրտը՝ ցույց կտա ժամանակը...