Ինչով է հայտնի երեք ամիս շարունակ պարապուրդի մատնված Շիրակի մարզպետը

Մի քանի ամիս առաջ՝ տարվա սկզբին, Շիրակի մարզպետի պաշտոնը ստանձնեց Մուշեղ Մուրադյանը, ով  մինչ այս բարձր պաշտոնին անցնելը զբաղեցրել է Արփի լիճ ազգային պարկի տնօրենի պաշտոնը: Ի դեպ, վերջինիս կողմից այս պաշտոնը ստանձնելու պատմությունը բավական ուշագրավ է: Շրջանառվող լուրերի համաձայն՝ «Արփի լիճ» ազգային պարկի տնօրենի իրական թեկնածուն հենց նա էր, չնայած այն հանգամանքին, որ մրցույթ էր հայտարարվել: Մուրադյանը վայելում էր Շիրակի նախկին մարզպետ Կարեն Սարուխանյանի հովանավորությունը: Ըստ մամուլի տեղեկությունների՝ նա էր բարեխոսել թեկնածուի օգտին, եւ  Շրջակա միջավայրի այն ժամանակվա նախարար Էրիկ Գրիգորյանը հենց նրան էր նշանակել «Արփի լիճ» ազգային պարկի տնօրեն: Կանոնադրության համաձայն անցողիկ շեմը հաղթահարած թեկնածուներից մեկին, ըստ նպատակահարմարության, նախարարը տնօրեն է նշանակում: Բարձրացված հարցը պայմանավորված է նրանով, որ նախարար Էրիկ Գրիգորյանը նպատակահարմար էր գտել 5-րդ հորիզոնականն զբաղեցրած թեկնածուին, ինչը հարցեր է առաջացնում:

Ներքին աուդիտի բաժինը, որը մինչ այդ ղեկավարում էր Մուրադյանը, ինչպես գիտենք, շատ հեռու է սարերում, Ազգային պարկի տարածքում վերահսկողություն իրականացնելու և մեծ անձնակազմ ղեկավարելու ունակությունից: Ովքեր ծանոթ են տեղանքին, կհասկանան, որ այստեղ կան բազմաթիվ խնդիրներ՝ որսագողության, պետական սահմաններին մոտ գտնվելու և դրանով պայմանավորված՝ բազմաթիվ վտանգների հետ: Ուստի, ենթադրվում է, նպատակահարմար պետք է լիներ մաքուր անցյալ ունեցող ու անընդմեջ արդյունքներ գրանցած թեկնածուի ընտրությունը:

Կարեն Սարուխանյանը, ում անվան հետ կապվում է Մուրադյանի նշանակումը, նշել էր, որ Մուշեղ Մուրադյանը, ղեկավարելով մարզպետարանի ներքին աուդիտի բաժինը, Սարուխանյանի՝ մարզպետ լինելու ընթացքում մեծ արդյունավետությամբ է աշխատել՝ բացահայտելով բազմաթիվ չարաշահումներ ու գողացված գումարը պետական բյուջե վերադարձնելով։ Ավելի վաղ տեղեկություն էր տարածվել, որ Մուրադյանի հայրը «Արփի լիճ» ազգային պարկի տարածքում գտնվող Զորակերտ գյուղում ֆերմերային մեծ տնտեսություն ունի, իսկ Ղազանչի գյուղի մոտ 200-300 հեկտար վարձակալությամբ տրված տարածք:

Եթե դիտարկենք, թե ինչով է այս ընթացքում զբաղված եղել մարզպետը, ապա հասկանալի է դառնում, որ նա մեղմ ասած՝ պարապուրդի մատնված է եղել: Պաշտոնական կայքից տեղեկանում ենք, որ երեք ամիսների ընթացքում մարզպետը հասցրել է մի քանի անգամ ընդունել տարբեր համայնքների բնակիչների, հայ-թուրքական սահմանին նոր եռագույն է բարձրացրել,  պատասխանել է աշակերտներին հետաքրքրող մի շարք հարցերի, ընդունել է Կանայք հանուն զարգացման ՀԿ-ի ներկայացուցիչներին, ինչպես նաև ընդունել է Աշոցքի ԲԿ-ի աշխատակազմին: Ինչ խոսք, անչափ բուռն գործունեություն է երեք ամիս մարզպետի պաշտոնը զբաղեցնող պաշտոնյայի համար...