ԲՀԿ-ական ավագանու անդամ Մարկոս Հարությունյանն Ավինյանի՞ն է ցանկանում տեսնել քաղաքապետի պաշտոնում (տեսանյութ)

Այսօր Երևանի ավագանու հերթական նիստն էր, որի ընթացքում բավական ուշագրավ մի դրվագ տեղի ունեցավ: Թեև երևանցիները արդեն սովոր են նրան, որ քաղաքապետի տեղակալ Տիգրան Ավինյանին թիմակիցները դե-ֆակտո քաղաքապետ են համարում, իսկ նախորդ նիստերից մեկում ընդհանրապես ոչ ավել, ոչ պակաս՝ «պարոն քաղաքապետ»-ով դիմեցին, միևնույն ժամանակ անսպասելի էր լսել, որ վերջինիս քաղաքապետի պաշտոնում են երազում տեսնել նաև ավագանու ընդդիմադիր անդամները: Դիցուք՝ Մարկոս Հարությունյանը:

Ավինյանի՝ մետրոյի Նազարբեկյան կայարանը կառուցելու խոստման ֆոնին Հարությունյանը թեև մի կողմից կասկածի տակ առավ, որ այդ «կայսերական» նախագիծը հնարավոր է լինելու կյանքի կոչել, մյուս կողմից, սակայն, անթաքույց իր գոհունակությունը հայտնեց Տիգրան Ավինյանի կատարած աշխատանքից, հիշեցրեց, որ հրապարակավ մշտապես վերջինիս մասին դրական կարծիքներ է հնչեցրել և չզլացավ անգամ ընդգծել, որ մի շարք նախագծեր կյանքի են կոչվել բացառապես Ավինյանի «տիտանական ջանքերի» գործադրման արդյունքում:

Սակայն, ամենաուշագրավն այն է, որ ավագանու ընդդիմադիր՝ ԲՀԿ-ն ներկայացնող անդամը լիահույս է, որ մոտակա հինգ տարիների ընթացքում էլ հնարավորություն կունենա աշխատել Ավինյանի հետ: Հասկանալի է, որ դա հնարավոր կլինի միայն այն դեպքում, եթե Տիգրան Ավինյանը սեպտեմբերին սպասվող ընտրությունների արդյունքում ընտրվի Երևանի քաղաքապետ: Ասել է թե՝ ավագանու ընդդիմադիր անդամը բացահայտ ցանկություն  է հայտնում, որպեսզի քաղաքապետի պաշտոնում ընտրվի ՔՊ թեկնածու Տիգրան Ավինյանը: Այստեղ երկու հարց է առաջանում՝ արդյո՞ք Հարությունյանի այս հայտարարությունը մեսիջ է առ այն, որ ԲՀԿ-ն մասնակցելու է սեպտեմբերին կայանալիք Երևանի ավագանու ընտրություններին և երկրորդ հարցը՝ արդյո՞ք Տիգրան Ավինյանին Երևանի քաղաքապետի պաշտոնում տեսնելու Հարությունյանի ցանկությունը համընկնում է ԲՀԿ պաշտոնական քաղաքական դիրքորոշման հետ..