ՔՊ-ականներից ում հանգիստ չի տալիս նախկին օդիոզ պաշտոնյաների «փառքը»

Այսօր մամուլում հայտնված տեղեկության համաձայն, 2 օր առաջ  Տեղ համայնքի ղեկավար Դավիթ Ղուլունցի եւ համայնքի բնակիչ, 23-ամյա Աշոտ Գալստյանի միջեւ վիճաբանությունն ավարտվել է ծեծկռտուքով, երկուստեք թիմակիցներին են կանչել, եւ խմբակային ծեծկռտուք է եղել։ Մամուլը գրել էր, որ այդ ծեծկռտուքի արդյունքում Ղուլունցի գլուխն է թեթեւ վնասվել, իսկ 23-ամյա երիտասարդը դեմքի շրջանում բազմաթիվ կոտրվածքներով տեղափոխվել է «Հերացի» հիվանդանոց։

Սա միակ դեպքը չէ, երբ ՔՊ-ական պաշտոնյաները ազատություն են տալիս իրենց ձեռքերին: Ամիսներ առաջ մամուլը գրել էր, որ Լոռու փոխմարզպետ Հովհաննես Ավետիսյանի օգնականի մասնակցությամբ միջադեպ է եղել: Լրատվամիջոցի հետ կապված քաղաքացին փոխանցել է, որ Լոռվա փոխմարզպետի տեղակալ Տիգրան Հովսեփյանը իր աչքի առաջ հարվածել է պարեկին ու պոկել նրա ուսադիրները:  Պարզվել է պաշտոնյային ընդամենը վարչական տուգանք են դուրս գրել:

Ծեծի մեծ սիրահարներ ՔՊ-ում էլի կան: Դիցուք՝ ՔՊ-ական պատգամավոր Սիսակ Գաբրիելյանը, ով ԱԺ դռների դիմաց ծեծի էր ենթարկել ընդդիմադիր ցուցարարներից մեկին և դեռ ինքն էլ այդ գործով ճանաչվել էր տուժող:

Ամիսներ առաջ մամուլը գրել էր, որ Օձունի համայնքապետ Արսեն Տիտանյանը պնդում է, որ Լոռու մարզպետ Արամ Խաչատրյանը պահանջել է հրաժարականի դիմում գրել, և որ մերժում ստանալուց հետո մարզպետարանի միջանցքում ծեծի են ենթարկել իրեն։ Մարզպետն էլ հակադարձում է, թե ընտրություններին ընդդիմադիր «Հայաստան» դաշինքին աջակցած համայնքապետը զրպարտում է, քաղաքական նպատակներով փորձում անվանարկել իրեն։ Պարզվում է, որ մարզպետարանի միջանցքում տեղադրված նկարահանող սարքը, որը կարող էր էական ապացույց լինել իրողությունը բացահայտելու համար, այդ օրը չի աշխատել։ 

Նմանատիպ մի դեպք էլ արձանագրվել էր 2019-ին: SHAMSHYAN. com-ի տեղեկություններով՝ վիճաբանություն-ծեծկռտուք էր տեղի ունեցել Կոտայքի մարզում: Ժամը 13:00-ի սահմաններում ոստիկանության Կոտայքի բաժին ահազանգ է ստացվել, որ Նոր Հաճնի կամրջի հարևանությամբ գտնվող տարածքում վիճաբանություն է տեղի ունեցել Աբովյան քաղաքի բնակիչ, 29-ամյա Ռուբեն Պետրոսյանի, և Կոտայքի մարզի Գեղամեջ գյուղի բնակիչ, 40-ամյա Գևորգ Հովհաննիսյանի միջև: Ռուբեն Պետրոսյանը ներկայումս ՊՎԾ պետի պաշտոնը զբաղեցնող Ռոմանոս Պետրոսյանի եղբայրն է:

2018-ին էլ էին կրքերը բավական թեժ, մամուլի ուշադրության կենտրոնում այն ժամանակվա Արարատի մարզպետն ու փոխմարզպետներն էին:

Շաբաթներ առաջ միջադեպ էր տեղի ունեցավ ԱԺ-ում՝ ՍԴ դատավորի թեկնածուի քվեարկության ժամանակ։ Նախասրահում լրագրողներից մեկը փորձում էր ԱԺ հաշվիչ հանձնախմբի անդամներից ՔՊ խմբակցության պատգամավոր Քրիստինե Պողոսյանին, որը նստած էր սեղանի մոտ, հարցնել, թե ո՞ր ՔՊ-ականի տուն են երեկ գնացել ցուցարարները։ Սակայն պատգամավորը հունից դուրս էր եկել և նույնիսկ փորձել էր հարվածել լրագրողին:

Ուշագրավն այն է, որ տառացիորեն այս նույն գործելաոճը ունեին նախկին իշխանության մերժված օդիոզ դեմքերը: 2016-ին ՀՀԿ-ական գյուղապետ, այնուհետև թեկնածու Միշա Ղրզոյանի որդու` Արթուր Ղրզոյանի կողմից ծեծի ենթարկված կինը` թոշակառու Սվետլանա Վարդանյանը, դիմել էր ՀՀ ոստիկանություն: Արագածոտնի երկարամյա ՀՀԿ-ական մարզպետ Սարգիս Սահակյանի եղբայրը՝ Նայիրի Սահակյանը, 2012-ին ծավալուն հարցազրույց էր տվել, որի ժամանակի իր հակառակորդ, Թալինի նախկին քաղաքապետ, ներկայումս ՀՀԿ-ական պատգամավոր Մնացական Մնացականյանին մեղադրել էր պատգամավոր դառնալու համար երգել-պարել-բաժակաճառեր ասելու համար և անվանել էր «սատկած նապաստակ», «չափառի տակի հոգնած դդում» և այլն։ Հարցազրույցում Նաիրի Սահակյանը նաև գլուխ էր գովել, թե «հազարավոր քո նմանները մեզանից տփոց ուտելով են ճանաչվել», հետո էլ չէր հերքել, որ մարդկանց է ծեծել։ 2017-ին Մասիսում Հանրապետականի տարածքային ցուցակով առաջադրված երկու թեկնածուների՝ Արայիկ Գրիգորյանի և Մուրադ Մուրադյանի կողմնակիցների միջև ծեծկռտուք էր եղել:

Այսինքն, ինչպես տեսնում ենք, նախկինների և ներկաների գործելաոճը գրեթե ոչնչով չի տարբերվում, եթե մինչ հեղափոխությունը բեսպրեդելի և ամենաթողության լեգիտիմ իրավունքը պատկանում էր ՀՀԿ-ական օդիոզ չինովնիկներին, ապա հեղափոխությունից հետո էստաֆետը վերցրել են հեղափոխական պաշտոնյաները...