«Ավատար. Ջրի ճանապարհը» ֆիլմի մաքուր եկամուտը գերազանցել է 531 միլիոն դոլարը

Ըստ Deadline-ի 2022 թվականի ամենաթանկ բլոկբաստերների ցուցակի առաջատարը Ջեյմս Քեմերոնի «Ավատար. Ջրի ճանապարհը» ֆիլմն է։

Ֆիլմը տոմսարկղում հավաքել է 531,7 միլիոն դոլար, հաշվարկներում հաշվի են առնվել ֆիլմի ստեղծման և առաջմղման ծախսերը, ինչպես նաև հանվել է կինոթատրոնների մասնաբաժինը։ «Ավատար»-ին հաջորդում է «Թոփ գան. Մավերիք»-ը, որը ստացել է 391,1 մլն դոլար մաքուր եկամուտ։ Երրորդ հորիզոնականը զբաղեցրած «Մինիոնները. Գրյուվիտացիա» մուլտֆիլմի մաքուր եկամուտը կազմել է 382 միլիոն դոլար։

Marvel-ի սուպերհերոսների մասին ֆիլմերը՝ «Դոկտոր Սթրենջ. Խելագարության բազմատիեզերքում» (284 միլիոն դոլար) և «Սև հովազ. ընդմիշտ Վականդա»  (259 միլիոն դոլար) զբաղեցրել են չորրորդ և հինգերորդ հորիզոնականները:

«Ավատար. Ջրի ճանապարհը» ֆիլմի պրեմիերան տեղի է ունեցել 2022 թվականի դեկտեմբերի 6-ին: Ժապավենը կինովարձույթում հավաքել է 2,243 միլիարդ դոլար և դարձել պատմության մեջ երրորդ ամենաշատ եկամուտ ունեցող ֆիլմը՝ առաջ անցնելով «Տիտանիկից»։