Հակասություններ՝ ՔՊ-ական նախարարների և պատգամավորների միջև. Հակոբ Արշակյան-Ռոբերտ Խաչատրյան

Որքան էլ որ ՔՊ ներսում փորձում են տպավորություն ստեղծել, որ ներթիմային որևէ լարվածություն տեղ չունի հեղափոխականների շրջանում, մի բան ակնհայտ է՝ վերջին շրջանում ՔՊ-ական տարբեր պաշտոնյաներ չեն թաքցնում հակասությունների այն շարանը, որն առկա է հատկապես գործադիրի անդամ ՔՊ-ականների և խորհրդարանում բազմած ՔՊ-ականների միջև:

Այն բանից հետո, երբ Հակոբ Արշակյանը հայտի սկանդալից հետո հրաժեշտ տվեց ԲՏԱ նախարարի պաշտոնին և նշանակվեց ԱԺ նախագահի տեղակալ, թվում էր, թե վերջինս այլևս որևէ ամբիցիաներ չունի այս ոլորտում: Մինչ նախարարի պաշտոնը զբաղեցնում էր Վահագն Խաչատրյանը՝ ներկայումս ՀՀ նախագահը, Արշակյանը քիչ թե շատ դիստանցիա էր պահում և չէր միջամտում ոլորտային հարցերին: Սակայն, իրավիճակը կտրուկ փոխվեց այն բանից հետո, երբ նախարարի պաշտոնում նշանակվեց Ռոբերտ Խաչատրյանը:

Դրանից հետո Հակոբ Արշակյանը առիթը բաց չի թողնում ի ցույց դնել, որ ոլորտի բոլոր ձեռքբերումների հիմքը դրվել է իր ղեկավարման ընթացքում: Բացի այդ, վերջինս ակտիվորեն մասնակցում է և ելույթներ է ունենում այնպիսի միջոցառումների ընթացքում, որտեղ առավել տրամաբանական կլիներ հենց նախարարի ելույթն ու մասնակցությունը; Դիցուք՝ Արշակյանը նախորդ տարվա հունիսի 8-ին ներկա է եղել ՀայՓոստի կազմակերպած՝ «Նոր փոստի ծնունդը» խորագրով միջոցառմանը, որի ընթացքում ամփոփվել են վերջին շրջանում ընկերության կատարած աշխատանքները, ձեռքբերումները, թվայնացման գործընթացը: Ընդ որում, Փաշինյանի ընտանեկան կայքը այնպես էր ներկայացրել, ասես միջոցառումը կազմակերպվել  է Արշակյանի ջանքերով, և ընդամենը մեկ տողով նշել էր, որ ներկա է նաև ԲՏԱ նախարար Ռոբերտ Խաչատրյանը

Արդեն այս տարվա մարտի 23-ին էլ Արշակյանը մասնակցել էր «Ներդրողի օր ՏՏ ոլորտի համար» միջոցառմանը և հայտարարել, որ  2022 թվականին առաջին անգամ Հայաստանի պատմության մեջ բարձր տեխնոլոգիական արդյունաբերության ոլորտում արձանագրվել է 1 մլրդ դոլարից ավելի շրջանառություն: Բնագավառի աշխատակիցների թիվն առաջին անգամ գերազանցել է 40 հազարը: Սակայն, ինչն է ուշագրավ, Արշակյանն ընդգծել է, որ այդ ցուցանիշին հնարավոր է եղել հասնել ոլորտին ուղղված ֆինանսավորման աճի շնորհիվ: Այսինքն՝ ոչ թե Խաչատրյանի տիտանական ջանքերի, ոչ թե նախարարության որակյալ աշխատանքի, այլ ֆինանսավորման աճի շնորհիվ:

Հակոբ Արշակյանն իրեն նախարարի գործառույթներ է վերապահում նաև արտասահմանյան այցերի ընթացքում: Դիցուք՝ նախորդ տարի  Տոկիոյում ԱԺ փոխնախագահը հանդիպել է Ճապոնիայի թվային վերափոխումների նախարար Տարո Կոնոյի հետ և կրկին քննարկել հենց ԲՏԱ ոլորտին առընչվող հարցեր: Մի բան, ինչը, կարծես թե, նախարարի լիազորությունների շրջանակում է:

Ռոբերտ Խաչատրյանն, իհարկե, հասցրել է պատասխան հարվածը հասցնել թիմակցին: Վերջերս հայտնի է դարձել, որ Հայաստանը մասնակցելու է փետրվարի 20-24-ը Աբու Դաբիում կայանալիք «IDEX 2023» միջազգային ռազմարդյունաբերական ցուցահանդեսին:  Հարցին՝ արդյո՞ք «IDEX 2023»-ին չի կրկնվի 2021 թվականի խայտառակ պատմությունը, ԲՏԱ նախարարության խոսնակը վստահեցրեց, որ նորմալ պատրաստվում են: «Ավելին, համապատասխան ցուցանմուշներն արդեն բարեհաջող հասել են Աբու Դաբի, որքանով տեղյակ եմ, պահվում են հատուկ պահեստում, որ հետո տեղափոխվեն արդեն տաղավարային հատված»,- ասել էր խոսնակը: Հիշեցնենք, որ «IDEX-2021»-ին ռազմական տեխնիկայի ցուցանմուշների փոխարեն հայկական տաղավարում միայն բուկլետներ էին եղել: Այդ ժամանակ ԲՏԱ նախարարը Հակոբ Արշակյանն էր: Ասել է թե, ԲՏԱ նախարարությունը քողարկված կերպով ակնարկել է, որ այս անգամ Արշակյանի պռավալը չի կրկնվի, քանի որ իրենք, ի տարբերություն վերջինիս, նորմալ պատրաստվում են...