Տուրիզմը Հայաստանում

Մեր երկրում զբոսաշրջության ոլորտի մասնագետները նշում են, որ Հայաստանն ունի բազմաթիվ նախադրյալներ զբոսաշրջության զարգացման համար: Հայաստանն, անխոս, հարուստ պատմամշակութային ժառանգություն ունի և նույնիսկ հեռավոր մարզերում կամ լեռներում կարելի է հանդիպել հին և զարմանալի կոթողներ, որոնց հանդեպ զբոսաշրջիկների հետաքրքրությունը երբեք չի մարում:

Բայց մենք ցավոք դեռ չունենք կուլտուրա` գնահատելու մեր ունեցածն ու պահպանելու մեր հարստությունը: Իհարկե լավ է, որ չնայած մեր հասարակության վերաբերմունքի և պետության մեջ տեղի ունեցող որոշ թերությունների, մեծ ուժ և եռանդ ենք թափում զբոսաշրջիկներին գրավելու համար, սակայն մինչ միջազգային հեռուստաալիքներով մեր երկրի գովազդումը, կարելի է հետևել գոնե ճանապարհների աղբակույտների վերացմանը:

Ըստ Հայկական տուրիստական գործակալությունների այսօրվա դրությամբ մեզ մոտ են գալիս մշակութային, էքստրեմալ, գիտական, բիզնես, կրոնական, առողջարանային, սպորտային հետաքրքրվածությամբ: Զբոսաշրջիկներն հիմնականում նախընտրում են այցելել Գառնի-Գեղարդ, Խոր Վիրապ, Նորավանք, Քարահունջ-Տաթև, Հաղպատ-Սանահին-Դսեղ, Գոշավանք:

«Այս վայրերից զբոսաշրջիկները անմոռանալի տպավորություններով են վերադառնում: Պարզվում է, որ մեր երկրով հետաքրքրողների թիվը գնալով մեծանում է: Վերջին տարիներին Հայաստանի նկատմամբ հետաքրքրությունը մեծացել է Իրանի, Եվրամիությունների երկրների, ԱՄՆ-ի, Սկանդինավյան երկրների, իսկ վերջին երկու տարում նաև Թուրքիայի զբոսաշրջիկների կողմից»,- հայտնեց «Թրավլ» տուրիստական գործակալության մենեջեր Արմին Արկադյանը:

Համաձայն Զբոսաշրջիկության համաշխարհային կազմակերպության վիճակագրական տվյալների Հայաստան այցելող զբոսաշրջիկների 62,2%-ը մեր հայրենակիցներն են: Հարազատներին և ընկերներին այցելած զբոսաշրջիկները կազմում են Հայաստան այցելող զբոսաշրջիկների 44,8%-ը: Զբոսաշրջիկների 2,4%-ը Հայաստան է այցելում համաժողովներին մասնակցելու և գործնական այլ նպատակներով: 13,1%-ը մեր երկիրը դիտարկում է հանգստի և ժամանցի վայր, իսկ 5,4%-ը Հայաստան է այցելում կրթություն ստանալու և բուժվելու համար:

Թվում է, թե բավականին լավ պայմաններ ունենք, որ գրկաբաց ընդունենք զբոսաշրջիկներին Սևանում, Դիլիջանում, Ջերմուկում և այլուր, սակայն ցավոք ամեն տարի մեր երկրում գործող հանգստյան տների սահմանած գները ստիպում է մտածել, որ արտասահմանցուն մեր երկիր կարող է բերել կամ մոլեռանդ ու անբացատրելի սերը, կամ ինֆորմացիայի պակասը: