«Արդարություն»՝ հեղափոխական ոճով․ սկանդալային միջադեպերի «հերոսները» ջրից չոր են դուրս գալիս

Մամուլում տարածված լուրերին համաձայն՝ օրեր առաջ գիշերը Թաիրով գյուղում գործող «Կալիֆորնիա» գիշերային ակումբում միջադեպ է եղել: Փարաքար խոշորացված համայնքի ղեկավար Դավիթ Մինասյանը եւ Գոռ անունով ևս մեկ անձ իրենց ընկերների հետ միասին, գտնվելով ոգելից խմիչքի ազդեցության տակ, անհարկի վիճաբանել են նշված ակումբում գտնվող անձանց հետ, հնչեցրել սեռական բնույթի հայհոյանքներ, բացահայտ անհարգալից վերաբերմունք դրսևորել հաճախորդների, նշված ակումբի աշխատակիցների նկատմամբ, բռնություն գործադրել հաճախորդների նկատմամբ և ապակյա բաժակներով հարվածել պատերին, կոտրել ակումբի ապակիները, այնուհետև նույն վարքագիծը դրսևորել ակումբից դուրս ճանապարհի երթևեկելի հատվածում, խափանել են ավտոմեքենաների բնականոն երթևեկությունը: Մինչ այս պահը, սակայն, որևէ մեկը որևէ կարգավիճակ չունի այս գործով, իսկ դա նշանակում է, որ, կարծես թե, փորձ է արվում ջրել աղմկահարույց դրվագը:

Սա, բնականաբար, առաջին դեպքը չէ: ԱԺ մարդու իրավունքների պաշտպանության եւ հանրային հարցերի մշտական հանձնաժողովի ապրիլի 4-ի նիստում ՄԻՊ թեկնածուների քննարկումը թեժ վեճերով է ուղեկցվել․ ընդդիմության թեկնածու Էդգար Ղազարյանը 2018թ․-ի հեղափոխությունն անվանել է «ադրբեջանաթուրքական գործընթաց»՝ պարզաբանելով, որ ոչ թե ժողովրդին նկատի ունի, այլ գործընթացի շահառուներին եւ հետեւանքները։ Իսկ ՔՊ-ականներից Արթուր Հովհաննիսյանը, Ռուստամ Բաքոյանը եւ այլք աչքի են ընկել «լեզուն կկտրեմ նրա, ով նման բան կասի», «անասուն», «կլոուն» եւ նմանօրինակ այլ արտահայտություններով։

Ամիսներ առաջ Թալինի ՋԸՕ-ում հնչած կրակոցների գործով անցնում էր այնուհետև Թալինի համայնքապետ ընտրված Տավրոս Սափեյանը։  Արմավիրի մարզի Քարակերտ գյուղում տեղակայված Թալին ՋՕԸ-ի գրասենյակ են մուտք գործել ՀԱԿ-ի Սափեյան եղբայրներն իրենց որդիներով ու զենքի սպառնալիքով փորձել են իրենց կրտսեր որդուն նշանակել պետի տեղակալ: Ծեծուջարդ է սկսվել, որին հաջորդել են կրակոցներ:

Սյունիքի մարզի Տեղ համայնքի ավագանու անդամ Մասիս Զեյնալյանը պնդում է, որ գյուղի մշակույթի տանը ծեծի է ենթարկվել Տեղ համայնքի ղեկավար Դավիթ Ղուլունցի կողմից:

Վայոց Ձորի նախկին մարզպետ Տրդատ Սարգսյանի նախկին օգնական Հարություն Գրիգորյանի կողմից ծեծի ենթարկվելուց հետո փոխգնդապետ Արա Մխիթարյանը հայտնվել է կոմայի մեջ և 2 տարի է` այդ վիճակում է։ Ինքը՝ նախկին մարզպետը, հերքում է իր առնչությունը այս դրվագին, սակայն ուշագրավ է, որ անմիջապես դրանից հետո հրաժարականի դիմում ներկայացրեց:

2021-ին  Կենտրոնի թաղապետարանի աշխատակիցները լրագրողներին պատմել էին, որ թաղապետի տեղակալը վիճաբանություն է ունեցել աշխատակիցներից մեկի հետ և ծեծել է նրան: Միջադեպը տեղի  էր ունեցել Կենտրոնի թաղապետի տեղակալ Արմեն Ազիզյանի և հողօգտագործման բաժնի պետ Մանուել Մարգարյանի միջև։ 

Ստացվում է, որ թեև 2018 թվականին հեղափոխական ամբիոնից հանրությանը խոստանում էին, որ իրենց՝ հեղափոխական թիմում նման դրվագներ չեն արձանագրվի, դեբոշների սիրահար պաշտոնյաներ չեն լինի և նաև դրանով հեղափոխականները կտարբերվեն նախկին իշխանության ներկայացուցիչներից, սակայն ժամանակը ապացուցում է, որ հեղափոխական թիմի ներկայացուցիչները նույնիսկ այս հարցում են շարունակում նախկինների ավանդույթները...