Արաբական երկրների լիգայի դիտորդները ժամանել են Սիրիա

Նախօրեին Սիրիա են ժամանել Արաբական երկրների լիգայի դիտորդական յոթ խմբեր, որոնք պետք է մոնիտորինգ անցկացնեն Սիրիայում տիրող իրավիճակի հետ կապված։ Ինչպես հաղորդում է արաբական «Al Jazeera»-ն, դիտորդների ընդհանուր թիվը մոտ հիսուն հոգի է, որոնք տեղի իրավապաշտպան խմբերի հետ պետք է դիտարկեն և գնահատական տան վերջին ինն ամիսների ընթացքում Սիրիայում տիրող քաղաքական ճգնաժամի վերաբերյալ։

Հիշեցնենք, որ միջազգային հանրության ճնշումների տակ Սիրիայի իշխանությունները համաձայնեցին Արաբական երկրների լիգայի կողմից դիտորդական խմբեր ուղարկել` տեղում իրավիճակն ուսումնասիրելու համար։ Ըստ ՄԱԿ–ի վերջին տվյալների` վերջին ինն ամիսների ընթացքում Սիրիայում հակակառավարական ցույցերի ժամանակ կառավարական զորքերի կողմից սպանվել է ավելի քան 5 հազ. քաղաքացի։