Ի՞նչ ճակատագրի արժանացան Փաշինյանի ու թիմակիցների խոստացած մեգանախագծերը

Վերլուծական 2 Մայիս, 2023 20:56

Ի՞նչ ճակատագրի արժանացան Փաշինյանի ու թիմակիցների խոստացած մեգանախագծերը

Նիկոլ Փաշինյանը և թիմակիցները հեղափոխությունից հետո մեկը մյուսի հետևից մեգանախագծերի անոնս էին անում և տպավորություն էր, որ Հայաստանը դառնալու է մի մեծ շինհրապարակ, ժողովուրդն էլ ի վերջո կունենա բաղձալի նոր աշխատատեղերը: Սակայն, հեղափոխությունից 5 տարի անց կարող ենք ամփոփել և եզրակացնել, որ Փաշինյանի և մյուս ՔՊ-ականների կողմից հանրությանը ներկայացված նախագծերից գրեթե ոչ մեկը այդպես էլ կյանքի չկոչվեց:

Դիցուք՝ դեռևս 2018 թվականին, Նիկոլ Փաշինյանը այցելում է Լոռու մարզ, որտեղ հայտարարում է նոր ավտոմեքենաների արտադրության մասին, որը ինչպես հետագայում պարզվում է, չի իրականանում:

Այն ժամանակ դեռ Ռոմանոս Պետրոսյանի կառավարման ներքո գտնվող Կոտայքի մարզպետարանը խրոխոտ ու ինքնավստահ կերպով հայտարարեց․ «Կոտայքի մարզում վերելակների արտադրություն կհիմնվի»։ Անցել է ավելի քան երկու տարի, բայց այս «գրանդիոզ» նախաձեռնությունից որեւէ ձայն-ծպտուն չկա։ Սա էլ, ինչպես Փաշինյանի կառավարության բազմաթիվ այլ խոստում-հայտարարություններ, մնաց թղթի վրա՝ որպես ժամանակից շուտ ոգեւորության, առուն չթռած՝ հոպ ասելու հերթական օրինակ։ Վերելակների գործարանը պետք է կառուցեին չինացիները Չարենցավանում։ Դրա համար նրանք այցելեցին Չարենցավան, տարածք ընտրեցին ու անհետացան։

ՀՀ քաղաքացին Փաշինյանից ակնկալում է պարզաբանում, թե ինչ եղավ նույն Արմավիրի Մերձավան համայնքի կենցաղային տեխնիկայի գործարանի հետ, որի բացմանը մասնակցեց 2018-ի դեկտեմբերին: Ի՞նչ եղավ 4,5 միլիոն ներդրման եւ ութսուն աշխատատեղի եւ 126 հազար միավոր տեխնիկայի հետ, որը պետք է արտադրվեր ընդամենը մեկ տարում: Իսկապես, ո՞ւր են հայկական հեռուստացույցները, որ բյուջեն լցնելու համար Փաշինյանը հույսը դրել է գյուղացու սիգարետի եւ օղու վրա։

Հայաստանում 10-15 միլիարդ դոլարի ներդրում պետք է արվեր այսպես կոչված` խելացի քաղաքների կառուցման համար։ Այս հարցը գտնվում էր այն ժամանակվա ԲՏԱ նախարար Հակոբ Արշակյանի կուռացիայի ներքո, սակայն, որ աստղաբաշխական ներդրումներին ականատես եղանք, ոչ առավել ևս այս կայսերական ծրագրի իրականացմանը։

Գյումրիում ճոպանուղի կառուցելու ֆանտաստիկ թվացող և լուրջ ներդրումներ պահանջող ծրագիրը ևս կյանքի չկոչվեց։ Այդ ընթացքում Շիրակի մարզպետի պաշտոնը զբաղեցնում էր Հովհաննես Հարությունյանը։

Արարատի նախկին մարզպետ Գարիկ Սարգսյանի խոսքով՝ 2020թ-ին մարզում պետք է իրականացվեին մի շարք ծրագրեր՝ ուղղված բիզնեսի, առողջապահության, կրթության ոլորտներին: Այն ժամանակվա մարզպետը նշել էր, որ գործարարի կողմից Երևան-Մխչյան ավտոճանապարհի վրա նախատեսվում է կառուցել 11 հեկտար մակերեսով գյուղմթերքի մանրամեծածախ շուկա, որի կառուցման համար կներդրվի $4.5 մլն: Թե ինչ եղավ հետո` անչափ հուզիչ էր: Դե իսկ հայտնի և մեմ դարձած կոկորդիլոսաբուծարանի մասին ընդհանրապես ավելորդ է հիշեցնել:

Էկոնոմիկայի նախարար Վահան Քերոբյանը նույնպես աչքի է ընկնում էքստրավագանտ խոստումներով։ Դրանցից մեկը Գյումրիում նյույորքցի Թոդդ Ֆաբաքերի ներդրմամբ՝ «Դիստրիկտ» էկո թաղամաս կառուցելու, մյուսը՝ «չոր նավահանգիստ» կամ արդյունաբերական պարկ հիմնելու մասին էր, որի հեղինակը ՀՀ կառավարությունն է։ Ի դեպ, գյումրեցիները տևական ժամանակ է՝ լսում են Վահան Քերոբյանի այս ծրագրի մասին, երբեմն ժպտում, ինչպես ժպտում էին ու հումոր անում Գյումրիում թռչող տրամվայի (Սքայ Գյումրի) ծրագիրը քննարկելիս։

2019 թվականի օգոստոսին մեծ շուքով հայտարարվում է Երևանում կառուցվելիք, 71 հարկանի երկնաքերի մասին, որի ճարտարապետական հայեցակարգի մշակման աշխատանքները պետք է կատարեր «Էլոյան Արքիթեքտս» ընկերությունը, որը 2019 թվականին ՀՀ փոխվարչապետ Տիգրան Ավինյանի խորհրդական, Ավետիք Էլոյանի եղբոր ընկերությունն է: Բնականաբար, այս նախագծից էլ դեռևս որևէ նորություն չկա, ավելին, ըստ որոշ տեղեկությունների, այն պարզապես կասեցվել է:

2019 թ․-ին վարչապետ Նիկոլ Փաշինյանը տեղեկացրել էր․ «Սկսում ենք Նորքի անտառի վերականգնման գործընթացը»։ Նույն տարում կառավարությունը 6 մլն դրամ էր հատկացրել ՇՄՆ անտառային կոմիտեին՝ Երևանում 45 հա տարածքում կաթիլային ոռոգման համակարգի ներդրման նախագծանախահաշվային աշխատանքների համար։ Պարզվում է, որ Նորքի լանջին որևէ վերականգնման աշխատանք չի կատարվել, որովհետև ոռոգման կաթիլային համակարգի հաշվարկի և նախագծի կազմման աշխատանքները պայմանագրով ստանձնած ընկերությունն իր պարտավորությունները չի կատարել, և գործը դատարանում է։

Թերևս ամենափիառված նախագիծը, որը այս տարիների ընթացքում առաջ են բրդում իշխանությունները Աջափնյակի մետրոյի նոր կայարանի կառուցումն է: Այդ խոստումը տալիս էին Հայկ Մարությանը, Հրաչյա Սարգսյանը, իսկ այժմ նրանց է միացել Տիգրան Ավինյանը: Մինչդեռ մետրոյի կայարանից դեռևս որևէ լուր չկա և հասկանալի չէ՝ այն կառուցվելու է ընդհանրապես, թե ոչ:

Ինչպես տեսնում ենք՝ իշխանությունների, մեղմ ասած, փնթի մանիպուլյացիաները շատ արագ ջրի երես են դուրս եկել, իսկ հպարտ քաղաքացիների՝ իրենց խաբված զգալու առիթները կրկնակի անգամ ավելացել են: