«Թող չսպասեն, որ Թուրքիային ցեղասպանության մեջ մեղադրելը կմնա անպատասխան»․ Էրդողանի խոսնակ

Թուրքիայի նախագահի մամուլի խոսնակ Իբրահիմ Կալընը մեկնաբանել է հայկական ավիաընկերության համար Թուրքիայի օդային տարածքի փակումը։

Այսպես, ըստ թուրքական լրատվամիջոցների, Թուրքիայի նախագահի աշխատակազմի ներկայացուցիչն ընդգծել է, որ Անկարան չի կարող չարձագանքել Հայաստանի վերջին քայլին։ Կալընը, մասնավորապես, նշել է. «Թող չսպասեն նրան, որ Թուրքիայի պատմական հիշողության դեմ ուղղված գործողությունները և նրան ցեղասպանության մեջ մեղադրելը կմնան անպատասխան։ Դա, իհարկե, կբերի օդային տարածքի փակմանը»։

Հիշեցնենք, որ ապրիլի 29-ին Թուրքիան առանց նախազգուշացման փակել էր իր օդային տարածքը հայկական Flyone Armenia ավիաընկերության դեպի Եվրոպա թռիչքների համար, իսկ ավիաընկերության Փարիզ-Երևան չվերթը հարկադիր վայրէջք էր կատարել Քիշնևում և միայն ապրիլի 30-ի գիշերը կարողացել էր վերադառնալ Զվարթնոց օդանավակայան։