Սկանդալային դրվագներ, որոնք «ճանաչելի» են դարձրել ՔՊ-ական անհայտ պաշտոնյաներին

Հետհեղափոխական Հայաստանի քաղաքական դաշտում բազմաթիվ են այնպիսի պաշտոնյաներ, որոնց մասին հանրությունն ունի մինիմալ տեղեկություններ: Եվ պատճառը, իհարկե, հասկանալի է․ այդ պաշտոնյաները գրեթե ոչնչով աչքի չեն ընկնում իրենց պաշտոնավարման ընթացքում: Բացառություն են կազմում միայն տարաբնույթ սկանդալները, որոնց պակասը այս հինգ տարիների ընթացքում չի նկատվում: Այսօր կանդրադառնանք այն պաշտոնյաներին, որոնց անունները հանրությունը լսել է առավելապես ոչ թե բեղուն աշխատանք կատարելու, այլ զանազան պիկանտ պատմությունների կիզակետում հայտնվելու համատեքստում:

Կենտրոնի թաղապետի նախկին տեղակալ Արմեն Ազիզյանը անմիջապես թաղապետարանի շենքում ծեծկռտուք է սարքել, իր շքախմբով հարձակվել է թաղապետարանի մեկ այլ աշխատակցի վրա։ Ընդ որում  ծեծի ենթարկվածը  Կենտրոն վարչական շրջանի ղեկավարի աշխատակազմի քաղաքաշինության և հողօգտագործման բաժնի պետ Մանուել Մարգարյանն է: Ձեռք բերված բավարար ապացույցների համակցությամբ՝ վարչական շրջանի ղեկավարի պաշտոնակատարին մեղադրանք է առաջադրվել՝ ՀՀ քրեական օրենսգրքի 309-րդ հոդվածի 2-րդ մասով:

Աջափնյակի թաղապետի նախկին տեղակալ Արտակ Մանուկյանը, ով հայտնի է ՄԵԽ մականվամբ, մամուլում հայտնվել է ոչ թե վարչական շրջանը բարեկարգելու իր  հեղափոխական ծրագրերով, այլ ... ծեծվելով:

Գյումրիում շաբաթներ առաջ տեղի ունեցած խուլիգանության ու հափշտակության գործով կալանավորվածներից մեկը ավագանու «Քաղաքացիական պայմանագիր» խմբակցության անդամ Աղասի Մաթևոսյանն է։  Ավելորդ է անգամ նշել, որ ավագանու անդամի անունը մինչ այս դեպքը որևէ այլ, առավել կառուցողական գործողության համատեքստում չի հիշատակվել և թերևս միայն այս դրվագից հետո գյումրեցիների մի ստվար հատված տեղեկացավ, որ համայնքապետարանում նման անուն ազգանունով ավագանի էր աշխատում:

Գյումրիի Լևոն Մադոյան և Տիգրան Մեծ փողոցների խաչմերուկում գտնվող մայթի վրա Գյումրիի ավագանու ՔՊ-ական անդամներից մեկը՝  Երվանդ Խանամիրյանն իրականացնում է շինարարական աշխատանքներ՝ չունենալով համապատասխան շին.թույլտվություն: Եթե այս դրվագը չլիներ, գյումրեցիները իրենց ավագանու անդամի հետ ծանոթանալու այլ առիթներ թերևս չունենային, քանի որ Խանամիրյանը բեղուն աշխատանքային գործունեությամբ բնավ էլ աչքի չի ընկել:

Մամուլում տարածված լուրերին համաձայն՝ օրեր առաջ գիշերը Թաիրով գյուղում գործող «Կալիֆորնիա» գիշերային ակումբում միջադեպ է եղել: Փարաքար խոշորացված համայնքի ղեկավար Դավիթ Մինասյանը եւ Գոռ անունով ևս մեկ անձ իրենց ընկերների հետ միասին, գտնվելով ոգելից խմիչքի ազդեցության տակ, անհարկի վիճաբանել են նշված ակումբում գտնվող անձանց հետ, հնչեցրել սեռական բնույթի հայհոյանքներ, բացահայտ անհարգալից վերաբերմունք դրսևորել հաճախորդների, նշված ակումբի աշխատակիցների նկատմամբ, բռնություն գործադրել հաճախորդների նկատմամբ և ապակյա բաժակներով հարվածել պատերին, կոտրել ակումբի ապակիները, այնուհետև նույն վարքագիծը դրսևորել ակումբից դուրս ճանապարհի երթևեկելի հատվածում, խափանել են ավտոմեքենաների բնականոն երթևեկությունը: Մինչ այս պահը, սակայն, որևէ մեկը որևէ կարգավիճակ չունի այս գործով, իսկ դա նշանակում է, որ, կարծես թե, փորձ է արվում ջրել աղմկահարույց դրվագը:

Տավուշի փոխմարզպետ Նարեկ Ղուշչյանի անունը ևս հանրության լայն շրջանակներին ոչինչ չի ասում և դա հասկանալի է, մարզում ամենաերևացող պաշտոնյան Փաշինյանի քավոր Ղալումյանն է: Մինչդեռ Ղուշչյանի անունը մամուլում հայտնվել է ընդամենը մեկ անգամ, երբ վերջինս Երևանում իր մեքենայով անցորդի էր վրաերթի ենթարկել:

Պատգամավոր Նարեկ Ղահրամանյանի մասնակցությամբ, ըստ մամուլին լուրերի, վերջերս ուշագրավ միջադեպ է տեղի ունեցել։ Նա զրկվել է վարորդական իրավունքից՝ հարբած վիճակում մեքենա վարելու պատճառով: ՔՊ-ական պատգամավորը կարելի է ասել ամենապասիվներից մեկն է իշխող խմբակցությունում և աչքի չի ընկնում խորհրդարանական ակտիվ գործունեությամբ: Աժ նիստերից մեկի ընթացքում էլ ընդհանրապես զբաղված էր հույժ կարևոր գործով՝ խաղ էր խաղում:

Շիրակի մարզը հեղափոխելուն լծված փոխմարզպետ Ալբերտ Այվազյանը նույնպես դեռևս չի արդարացնում իրեն այդ պաշտոնում նշանակողների հույսերը: Նրա անունը հայտնվում է հիմնականում սկանդալային քրոնիկոնում: Օրերս Կոռուպցիայի կանխարգելման հանձնաժողովը (20 սեպտեմբեր 2022թ եզրակացություն 01/2022) քննության առնելով Ալբերտ Այվազյանի կողմից անհամատեղելիության պահանջների առերևույթ խախտման վերաբերյալ 2022թ․ հուլիսի 11-ին հարուցված թիվ 01/2022 վարույթի նյութերը, պարզել է, որ Ալբերտ Այվազյանը 05․12․2021 թ․ ՀՀ Շիրակի մարզի Ախուրյան համայնքի ավագանու անդամ է ընտրվել «Քաղաքացիական պայմանագիր» կուսակցության համամասնական ցուցակով, որից հետո ՀՀ վարչապետի` 05․01․2022թ․ թիվ 15-Ա որոշմամբ նշանակվել է ՀՀ Շիրակի մարզպետի տեղակալի պաշտոնում։ Ալբերտ Այվազյանը մինչ օրս զբաղեցնում է ՀՀ Շիրակի մարզի Ախուրյան համայնքի ավագանու անդամի և  Շիրակի մարզպետի տեղակալի պաշտոնները։ Եզրակացության մեջ նշվում է, որ ՀՀ Շիրակի մարզպետի տեղակալ Ալբերտ Այվազյանի կողմից  խախտվել են «Հանրային ծառայության մասին» օրենքի 31-րդ հոդվածի 1-ին մասի պահանջները։

Հետ չի մնացել Տեղ համայնքի ղեկավար Դավիթ Ղուլունցի մասին, ով, անկախ գյուղում ստեղծված իրավիճակից, այդպես էլ չցանկացավ գոնե արտաքուստ հրապարակային ակտիվություն ցուցաբերել: Փոխարենը նա նույնպես վերջերս հայտնվեց սկանդալային քրոնիկոնում: