Էրդողանի նախընտրական հանրահավաքին 1,7 միլիոն մարդ է մասնակցել

Մոտ 1,7 միլիոն մարդ կիրակի օրը Ստամբուլում մասնակցել է Թուրքիայի գործող նախագահ Ռեջեփ Թայիփ Էրդողանի գլխավոր և ամենազանգվածային հանրահավաքին՝ մայիսի 14-ին նշանակված նախագահական ընտրություններից առաջ, գրում է ՏԱՍՍ-ը։

«Ըստ ինձ հասած պաշտոնական տվյալների՝ հանրահավաքին մասնակցում է մոտ 1,7 միլիոն մարդ։ Եթե Ստամբուլի բնակիչներն այո ասեն ընտրություններին, ապա նախագահի ընտրության հարցը կարելի է լուծված համարել»,- ասել է Էրդողանը։

Նա հանրահավաքում հայտարարել է մի շարք նախընտրական խոստումների մասին, այդ թվում՝ կապված «Ստամբուլի մեծ թունելային նախագծի» իրականացման հետ, որը նախատեսում է Բոսֆորի տակով տրանսպորտային միջանցք կառուցել, որի շնորհիվ նախատեսվում է միացնել 11 տարբեր տրանսպորտային զարկերակներ, որոնք օրական օգտագործվում են քաղաքի 6,5 միլիոն բնակիչների կողմից: Ավելի վաղ թուրքական իշխանությունները երկու նմանատիպ նախագիծ էին իրականացրել Մարմարա ծովի տակ։ Բացի այդ, Էրդողանը խոստացել է ընտրություններում հաղթելուց հետո իր առաջին ելույթը ունենալ Ստամբուլում, ոչ թե Անկարայում, ինչն ավանդաբար անում էր նախկինում։

Թուրքիայում մայիսի 14-ին կայանալիք ընտրություններին, ըստ ԿԸՀ-ի, կարող է մասնակցել հանրապետության 64 մլն քաղաքացի։