Նիկոլ Փաշինյանի և ՔՊ-ի կողմից «քցվածները»

2018 թվականի թավշյա հեղափոխության օրերին Նիկոլ Փաշինյանի և նրա թիմի հաջողության մեջ զգալի ավանդ էին ունեցել գյուղացիները, տաքսիստները, առևտրականները, բնապահպանները և այլն: Կարելի է ասել, որ հենց այս ՝ այսպես կոչված հասարակ ժողովրդի ներկայացուցիչներն էլ ապահովեցին Փաշինյանի հաջողությունը փողոցում, իսկ այնուհետև ամրագրեցին այն դե-յուրե ընտրատեղամասերում: Բնականաբար նրանք ունեին սպասելիքներ և առաջին հերթին այն պատճառով, որ այդպիսի սպասելիքների ակնկալիք ներշնչել էր ինքը Փաշինյանը ՝ իր խոստումներով: Սակայն, հեղափոխությունից հինգ տարի անց պետք  է փաստենք, որ հենց հանրության այս սեգմենտն է ամենաշատը խաբվել և քցվել հեղափոխականների կողմից:

«Հայաստանում ոռոգման ջուրը նույնքան հասանելի պետք է լինի, որքան էլեկտրական հոսանքն է տարածված և հասանելի»,- այս խոսքերի հեղինակը վարչապետի պաշտոնակատար Նիկոլ Փաշինյանն է։ Խոստումը տվել է 2018թ․ մայիսի 8-ին Ազգային ժողովում, երբ փորձում էր համոզել, որ ինքը կլինի լավագույն վարչապետը բոլոր առումներով։ 2019-ին և նախորդ տարի ոռոգման ջուր չեղավ, Փաշինյանի կառավարությունը ոռոգման սեզոնի ավարտին միայն թույլ տվեց Սևանից ջրառ անել, և գյուղատնտեսությունը մոտ երկնիշ անկում գրանցեց, ինչը բացառիկ էր։ Այս տարի արդեն ակնհայտ խնդիրներ են ի հայտ եկել կապված ոռոգման ջրի հետ, սակայն, կառավարությունը միայն ընդունում է խնդիրների առկայության փաստը և որևէ լուծում չի առաջարկում: Փաշինյանը, ըստ էության, խաբել է գյուղացիներին և շարունակում է դա անել նաև այսօր: Հեղափոխության օրերին նա խոստանում էր ջրել գյուղացիների վարկերը, դառնալով վարչապետ` նա հայտարարեց, որ նման քայլի գնալը նպատակահարմար չէ: Նա խոստանում էր անձամբ գնալ ՋԸՕ պետերի տները և ձեռքներից բռնած դուրս շպրտել, եթե վերջիններս օրենք խախտեն: Չնայած գյուղացիների շարունակվող բողոքների` քանի՞ ՋԸՕ պետի ձեռք բռնեց այս իշխանությունը: Փաշինյանը խոստանում էր, որ գյուղացին բերքը իրացնելու հետ որևէ խնդիր չի ունենալու, այնուհետև ի հայտ եկավ կոնֆլիկտը մթերող ընկերությունների, նույն Սպայկայի հետ, ինչի արդյունքում տուժեց միայն ու միայն գյուղացին: Փոխարենը` Փաշինյանը իրագործեց սպանդանոցների կառուցման ծրագիրը, ինչը, ի դեպ, չէր խոստացել և ինչին, ի դեպ, գյուղացիները դեմ էին:

Այժմ գանք տաքսիստներին, որոնք հեղափոխության օրերին Փաշինյանի համար ճանապարհներ էին փակում: Ինչպես՞ նրանց շնորհակալ եղավ Փաշինյանը: Նախ նշենք, որ Փաշինյանը խոստանում էր տաքսիստներին ազատել հարկերից, նրանց համար աշխատելու և երկու կոպեկ փող վաստակելու արժանավայել պայմաններ ստեղծել: Արդյունքում ունեցանք տաքսիստների լիցենզավորման մասին օրենք, բալային համակարգի մասին օրենք, ԱՊՊԱ-ի թանկացում, ինչը ուղղակիորեն հարվածեց տաքսիստների գրպանին:

Հեղափոխության օրերին Փաշինյանը հայտարարում էր, որ առևտրականները իշխանությունների ձեռքը ամենաշատ տուժած անձինք են, քանի որ վերջիններիս խեղդում են հարկերով, ամեն ինչ անում են միայն յուրային օլիգարխների՝ խոշորների բիզնեսը պաշտպանելու և այդ բիզնեսին օժանդակելու համար: Բնականաբար, Փաշինյանը խոստանում էր իշխանության գալուն պես վերացնել այդ անարդարությունը: Այսօր, իշխանությունները արտոնելով հերթական օլիգարխի կողմից մոլի կառուցումը, միևնույն ժամանակ արգելում են փողոցի առևտրականների աշխատանքը սպառնում վերջիններիս տուգանքներով և անգամ ապրանքի առգրավմամբ:

Բնապահպանները ևս խաբված շերտին են պատկանում: Հեղափոխության օրերին և մինչ այդ էլ ընդդիմադիրները իրենց դիրքավորում էին իբրև հանքերի դեմ պայքարի առաջամարտիկներ, խոսում էին բնության պահպանման և բնության հաշվին հարստանալու անթույլատրելիության մասին: Այսօր սակայն կառավարությունը որոշել է վերաբացել Ամուլսարի հանքը, շռայլորեն արտոնություններ է տրամադրում հանքաարդյունաբերության ոլորտի մյուս ընկերություններին: 

Փաշինյանը նաև Նաիրիտ գործարանի հարցն էր պատրաստվում լուծել և հույսեր էր ներշնել երկար տարիներ հանգուցալուծման սպասող նաիրիտցիներին: Սակայն, միակ բանը որ հայտնի է հինգ տարի անց այն է, որ ըստ որոշ լուրերի Նաիրիտը վերագործարկելու փոխարեն ընդամենը ռասկուլաչիտ են արել և  մաս-մաս վաճառում են:

Անշուշտ, հեղափոխության օրերին խաբվել են շատերը, եթե չասենք՝ մեծամասնությունը: Սակայն, վերը նշված սեգմենտը հանդիսանում էր Փաշինյանի համար ակտիվորեն պայքարող սեգմենտ և ի վերջո՝ Փաշինյանի և թիմի հիմնական էլեկտորատն էր: Սպասվում էր, որ գոնե հանրության այս շերտերին տված խոստումները Փաշինյանը և թիմակիցները սառույցին չեն գրի և կկատարեն, սակայն, ինչպես տեսնում ենք, Փաշինյանն ու ՔՊ-ն խաբել և քցել են անգամ իրենց իսկ հիմնական էլեկտորատին...