Հեղափոխությունը «խժռում» է սեփական զավակներին

Երեկ հայտնի դարձավ, որ  Իջևան համայնքի նախկին ղեկավար Վարդան Ղալումյանին, «Իջևանի վերնատուն պատկերասրահ» ՓԲԸ նախկին տնօրենին և մի քանի աշխատակիցներին մեղադրանք է ներկայացվել կոռուպցիոն չարաշահումների համար։ Մասնավորպես, 2011-2019թթ. ընթացքում Իջևան համայնքի նախկին ղեկավարի պաշտոնն զբաղեցրած Վարդան Ղալումյանը 2016թ. հունիսի 1-ին իր ընկերոջ կնոջը նշանակել է «Իջևանի վերնատուն պատկերասրահ» ՓԲԸ բյուջետային հիմնարկի տնօրենի պաշտոնակատար, իսկ 2016թ. հուլիսի 3-ին՝ նույն հիմնարկի տնօրեն: Այդ ընթացքում վերջինս փաստացի աշխատանքի չի ներկայացել, բայց ստացել է ընդհանուր 698.365 ՀՀ դրամ աշխատավարձ: Բացի այդ, ՓԲԸ-ում որպես լրագրող ձևակերպված մեկ այլ անձ 2016թ. հունիսի 4-ից մինչև 2018թ.-ի հուլիսի 20-ն աշխատանքի չի ներկայացել և աշխատանքային պարտականությունները չի կատարել, բայց ՓԲԸ տնօրենը, ունենալով համապատասխան լիազորություններ, հանձնարարել է հաշվարկել և նրան վճարել այդ ժամանակահատվածի համար դրույքաչափերով նախատեսված աշխատավարձը՝ ընդհանուր 1.074.997 ՀՀ դրամի չափով:

Ուշագրավն այս պատմության մեջ այն է, որ Վարդան Ղալումյանը հանդիսանում է Տավուշի մարզպետ Ղալումյանի հեռավոր ազգականը: Իսկ մարզպետ Ղալումյանը, ինչպես գիտենք, Նիկոլ Փաշինյանի քավորն է: Եվ, ընդհանրապես, Ղալումյանների ընտանիքը բողոքելու առանձնակի առիթներ չունի: Մի եղբայրը պատգամավոր է, մյուսը՝ մարզպետ: Բայց արի ու տես, որ հեռավոր ազգականի բախտը այդքան էլ չի բերել և դա չնայած այն հանգամանքին, որ վերջինս հեղափոխությունից հետո շուրջ մեկ տարի շարունակել է պաշտոնավարել, ասել է թե՝ առանձնակի խնդիրներ Փաշինյանի և ՔՊ-ի հետ չի ունեցել և հրաժարական է ներկայացրել միայն  2019 թվականին: Նա լքել էր ՀՀԿ-ն և նույնիսկ դեմ չէր ՔՊ-ին անդամակցել:

Զավեշտալի է դիտել, թե ինչպես է հեղափոխությունը խժռում իր իսկ զավակներին կամ ասենք այսպես՝ զավակների ազգականներին....