Վահան Քերոբյանի հերթական անհաջող «կատակը»

2023 թ․ ապրիլին զբոսաշրջային հոսքերը շարունակում են մնալ բավականին ուժեղ՝ 179,639 ցուցանիշով, որը 30 %-ով գերազանցում է նախահամաճարակային ցուցանիշը։ Այս մասին Facebook-ի իր էջում գրել է Էկոնոմիկայի նախարար Վահան Քերոբյանը:

Նա նաեւ նշել է. «Այսպիսով՝ տարվա առաջին չորս ամիսներին Հայաստան է այցելել 630 հազար զբոսաշրջիկ, որը մոտ 34 %-ով գերազանցում է 2019 թ․ ցուցանիշը»։

Անշուշտ, մենք էլ Քերոբյանի պես կուրախանայինք և կհպարտանայինք այս ցուցանիշներով , եթե չհիշեինք վերջինիս կողմից խոստացված 319 տոկոս աճը: Այն ժամանակ նախարարի այս հայտարարությունը ևս, կանխատեսվող երկնիշ տնտեսական աճից հետո, շատերի համար տարօրինակ թվաց։ Հատկապես որ, մի կողմից՝ պահպանվում էին համավարակի հետ կապված բարձր ռիսկերը, մյուս կողմից՝ Հայաստանը հայտնվել էր անվտանգային խորը ճգնաժամի մեջ։  Հետո պարզվեց, որ 319 տոկոս աճին Վահան Քերոբյանը ոչ թե հետազոտությունների և վերլուծությունների արդյունքում էր հանգել, այլ ուղղակի կանխատեսել էր, որ Հայաստան կայցելի 1,2 մլն տուրիստ։ Այն էլ, թարսի պես այդ տարի Հայաստան այցելեց ընդամենը 870 հազար զբոսաշրջիկ՝ ըստ պաշտոնական վիճակագրության:

Ստացվում է՝ 319 տոկոս աճ խոստացած պաշտոնյան այժմ ուրախանում է 34 տոկոս աճով, ինչպես ասում են՝ գործ ունենք հերթական իջեցված նշաձողի և անհաջող «կատակի» հետ...