Հերթական քարոզչական «փուչիկն» էլ պայթեց

Վերակառուցման և զարգացման միջազգային բանկը ՀՀ կառավարությանը 92 300 000 եվրո արժողությամբ վարկ կտրամադրի։ Վարկի նպատակը բյուջետային աջակցությունն է։ Որոշման հիմնավորման համաձայն՝ բյուջետային աջակցության միջոցներն ուղղվելու են 2023 թվականի պետական բյուջեի պակասուրդի ֆինանսավորմանը, մասնավորապես` կլիմայի փոփոխության մեղմացման և հարմարվողականության խթանմանը, շրջակա միջավայրի կառավարման համար կարգավորող շրջանակի բարելավմանն ուղղված միջոցառումներին ու բարեփոխումների իրականացմանը։ «Կանաչ, դիմակայուն և ներառական զարգացման քաղաքականության վարկ» վարկային համաձայնագիրը Հայաստանի Հանրապետության ու Վերակառուցման և զարգացման միջազգային բանկի միջև ստորագրվել է 2023թ․–ի ապրիլի 4-ին:

 

Ուշագրավն այս պատմության մեջ այն է, որ տարվա սկզբից կառավարությունը հայտարարում էր բյուջեի աննախադեպ մուտքերի մասին, հանրությանը փորձում էին համոզել, որ ամեն բան կարգին է և փողի խնդիր ինչպես ասում են՝ չի լինի: Մինչդեռ պարզվում է, որ փողի խնդիրը առկա է, այն էլ այն աստիճան, որ կառավարությունը ստիպված շուրջ 100 միլիոն եվրոյի վարկ է վերցնում, որպեսզի բյուջեի դեֆիցիտը փակի: Իհարկե, տրամաբանական հարց է առաջանում՝ եթե բյուջեի մուտքերն այդքան աննախադեպ էին, ինչպես փորձում են մեզ համոզել, դեֆիցիտն ինչպե՞ս առաջացավ, որ այժմ էլ սերունդների վարկային բեռը ծանրացնելու միջոցով պետք է այն փակեն: Ինչպես երևում է՝ պայթում է իշխանությունների հերթական քարոզչական փուչիկը։