Նիկոլ Փաշինյանը մաքրո՞ւմ է Աշոտ Արսենյանի «մութ անցյալը»

2018 թվականի հուլիսին տեղեկություն տարածվեց, որ ոստիկանության՝ կազմակերպված հանցավորության դեմ պայքարի գլխավոր վարչության կոռուպցիայի և տնտեսական գործունեության դեմ ուղղված հանցագործությունների հակազդման վարչության ծառայողների ստացած օպերատիվ տեղեկությունների հիման վրա ձեռնարկված հետախուզական միջոցառումներով, որոնց մասնակցել են նաև ոստիկանության Վայոց ձորի մարզային վարչության և Եղեգնաձորի բաժնի ծառայողները, պարզվել է, որ Վայոց ձորի մարզի Մալիշկա համայնքի ղեկավարն ու որդին՝ համայնքի մարզադպրոցի տնօրենը, իրենց պաշտոնեական դիրքն օգտագործել են հակառակ ծառայության շահերի։

Պարզվել էր նաև, որ   2017 թվականի ապրիլին տեղի ունեցած Ազգային ժողովի ընտրություններին Մալիշկա համայնքի ղեկավար Մհեր Մովսիսյանը, որը Հայաստանի հանրապետական կուսակցության անդամ է, պատգամավորի թեկնածու Աշոտ Արսենյանից առձեռն ստացել է 13.000.000 դրամ՝ ընտրակաշառք բաժանելու և Արսենյանի օգտին 1300 ձայն ապահովելու նպատակով։

Այսօր հայտնի դարձավ, որ նախկին համայնքապետը ազատազրկման է դատապարտվել: Մալիշկա համայնքի նախկին ղեկավարն, ըստ դատախազության, մեղավոր է ճանաչվել 2017 թվականի ապրիլի 2-ի Ազգային ժողովի ընտրություններին «ընտրողներին կաշառք տալու, իրեն վստահված զգալի և խոշոր չափերով գույքը, պաշտոնեական դիրքն օգտագործելով, յուրացնելու եղանակով հափշտակելու, ինչպես նաև մի խումբ պաշտոնատար անձանց հետ համատեղ պաշտոնեական կեղծիք կատարելու համար»: Սակայն, պաշտոնական ռելիզում որևէ կերպ չի նշվում Աշոտ Արսենյանի անունը:

Ինչպես ասում են՝ իրավիճակ է փոխվել, անմիջապես հեղափոխությունից հետո այս իշխանությունները հայտարարում էին, որ ընտրակաշառք բաժանած ոչ մի նախկին պաշտոնյա չի պլստալու, ոչ արդար և օրենքի շրջանակներում քննվելու են բոլոր դեպքերը: Սակայն, այսօր, Աշոտ Արսենյանի որդին՝ Վահագն Արսենյանը, ՔՊ ցուցակով Ջերմուկի ընտրված համայնքապետն է, իսկ իրեն ՝ Աշոտ Արսենյանին, ինչպես երևում է, Նիկոլ Փաշինյանը որոշել է մաքրել բոլոր քրեական գործերից...